პოლიტიკა

ხორავას ქუჩის საქმის შემსწავლელ კომისიას „ევროპულმა საქართველომ“ მართლაც დაუკარგა ის მნიშვნელოვანი მანდატი, რისთვისაც შეიქმნა - ეკა ბესელია

ხორავას ქუჩაზე მოზარდების მკვლელობის საქმის შემსწავლელი დროებითი საპარლამენტო საგამოძიებო კომისიის წევრმა ეკა ბესელიამ მასში შემავალი „ევროპული საქართველოს“ წევრები იმაში დაადანაშაულა, რომ მათ კომისიას დაუკარგეს „ის მნიშვნელოვანი მანდატი, რისთვისაც შეიქმნა.

მისი განმარტებით, დღევანდელ სხდომაზე „პიკი იყო ყველა უკანონობისა და უსაქციელობის, რასაც ადგილი აქვს „ევროპული საქართველოს“ წარმომადგენლების მხრიდან“.

„ევროპული საქართველოს“ წევრებს არ აინტერესებთ, რა ინფორმაცია შეიძლება მიაწოდოს კომისიას მოწვეულმა პირებმა. ვხედავდით, როგორ ირღვეოდა პროცედურა და კანონის მოთხოვნები, თუმცა ამის მიუხედავად, დავიცავით ჩვენი მხრიდან წესი. რაც ხდება ელენე ხოშტარიას, ან სხვათა მხრიდან არის აბსოლუტურად შეუფერებელი, უღირსი საქციელი დეპუტატის მხრიდან, რომელიც ვერ აკონტროლებს თავს, გადადის პერსონალურ შეურაცხყოფაზე. მგონია, რომ ამ ადამიანებს გაცნობიერებული არა აქვთ, უფლებამოსილებები. ესენი არიან აბსოლუტურად უპასუხისმგებლო, კანონისადმი უპატივცემულოდ განწყობილი ადამიანები და ამ კომისიას „ევროპულმა საქართველომ“ მართლაც დაუკარგა ის მნიშვნელოვანი მანდატი, რისთვისაც შეიქმნა“, – განაცხადა საპარლამენტო უმრავლესობის წევრმა.

საგამოძიებო კომისიის დღევანდელ სხდომაზე, სადაც შსს-ის გამომძიებლებს კითხავდნენ, შეკამათება რამდენჯერმე მოხდა. უმრავლესობის და „ევროპული საქართველოს“ წევრები ერთმანეთს კანონის დარღვევაში ადანაშაულებდნენ და პროცესუალურ საკითხებზე დაობდნენ.