სამართალი

ხორავას ქუჩის საქმეზე შექმნილი საგამოძიებო კომისია საბოლოო დასკვნას 5 სექტემბერს მიიღებს

ხორავას ქუჩაზე მოზარდების მკვლელობის საქმეზე შექმნილი დროებითი საპარლამენტო საგამოძიებო კომისიის სხდომები ფორსირებულ რეჟიმში წარიმართება და 5 სექტემბერს კომისია საბოლოო დასკვნას მიიღებს.

კომისიის თავმჯდომარის, სერგი კაპანაძის განცხადებით, სხდომები გაიმართება 1, 2, 3 და 4 სექტემბერს, ხოლო 5 სექტემბერს დასკვნასა და რეკომენდაციებს უყრიან კენჭს. ამასთან, დღეიდან სხდომები საჯარო იქნება.

„მუშაობის გრაფიკი იქნება ფორსირებული, რადგან საკმაოდ ვრცელი დოკუმენტია წარმოდგენილი. სხდომები გაგრძელდება 5 სექტემბრამდე, ხოლო 5 სექტემბერს პროექტს ვუყრით კენჭს. ამის შემდეგ მომდევნო პლენარულ სხდომაზე მოხდება დასკვნის წარდგენა“,- თქვა კაპანაძემ.

მისივე თქმით, ევროპული საქართველოს მიერ წარდგენილი პროექტი ეყრდნობა იმ ფაქტობრივ გარემოებებს, რომელიც გამოვლინდა კომისიის სხდომებისა და მასალების შესწავლის დროს.