სამართალი

ხორავას ქუჩაზე მოზარდების მკვლელობის საქმეზე შექმნილმა საგამოძიებო კომისიამ გამოსაკითხ პირთა სია დაამტკიცა

ხორავას ქუჩაზე მოზარდების მკვლელობის საქმეზე შექმნილი საგამოძიებო კომისიის ფარგლებში გამოსაკითხ პირთა სია ცნობილია.

დროებითმა საგამოძიებო კომისიამ გამოსაკითხ პირთა სია დაამტკიცა.

როგორც დღეს გამართულ სხდომაზე კენჭისყრის შედეგად გადაწყდა, კომისიის ფარგლებში პირველ რიგში მოკლული მოზარდების ოჯახის წევრები დაიკითხებიან.

სია კომისიის ხელმძღვანელმა სერგი კაპანაძემ წარადგინა და მას მხარი როგორც საპარლამენტო უმცირესობის, ასევე უმრავლესობის წარმომადგენლებმა, ასევე დამოუკიდებელმა დეპუტატმა სალომე ზურაბიშვილმა დაუჭირა.

სარალიძისა და დადუნაშვილის შემდეგ საგამოძიებო კომისია გამოკითხავს ოჯახის ადვოკატებს. კომისიის ფარგლებში დაიბარებენ: შს მინისტრს, გიორგი გახარიას, მის მოადგილეს ნათია მეზვრიშვილს და იუსტიციის მინისტრს თეა წულუკიანს.

ასევე გამოიკითხება ყოფილი მთავარი პროკურორი ირაკლი შოთაძე, საქმის პროკურორები და თბილისის პროკურორი.

გარდა ამისა, საგამოძიებო კომისიის ფარგლებში გამოკითხავენ პატიმრობაში მყოფ მირზა სუბელიანსა და მერაბ მორჩაძეს. დასაკითხთა სიაშია ასევე მიხეილ კალანდია.

დღესვე ცნობილი გახდა, რომ დროებითი საპარლამენტო საგამოძიებო კომისიის მუშაობაში სახალხო დამცველიც ჩაერთვება.

ნინო ექვთიმიშვილი