სამართალი

ხორავას ქუჩაზე მომხდარი მკვლელობის საქმეზე სამუშაოდ ბრიტანელი ექსპერტები მოიწვიეს

ხორავას ქუჩაზე მომხდარი მკვლელობის საქმეზე სამუშაოდ ბრიტანელი ექსპერტები ჩამოვლენ.

ერთ-ერთი ბრალდებული მოზარდის ინტერესების დამცველის, ტარიელ კაკაბაძის ინფორმაციით, მოწვეული ექსპეტები შეეცდებიან იმის გარკვევას, თუ რამდენი დანა მონაწილეობდა საქმეში.

"დაახლოებით ორ დღეში საქართველოში ჩამოდიან ბრიტანელი ექსპერტები, რომლებიც მუშაობენ ამ საქმეზე. ისინი დაცვის მხარის ინიციატივით არიან მოწვეული. სწორედ დაცვის მხარის სურვილია საქმეზე დადგინდეს უტყუარი ჭეშმარიტება და გაირკვეს დაჭრის პროცესში რამდენი დანა მონაწილეობდა.

მიგვაჩნია, რომ თუ ამ კითხვას პასუხი გაეცემა, საქმეზე ჭეშმარიტება მარტივად დადგინდება. სამწუხაროდ, ბრალდების ვერც ერთი მტკიცებულება, რომელიც ამ საქმეში არსებობს, ამ კითხვას ვერ პასუხობს", - განაცხადა ადვოკატმა.

მისივე თქმით, გამოძიება არასწორად მიმდინარეობს, სწორედ ამიტომ იცვლება ჩვენებებიც. კაკაბაძის განცხადებით, ბრალდების მხარის მიერ მნიშვნელოვანი მოწმის წარმოდგენის შემთხვევაში, ჩვენება ამჯერადაც შეიცვლება.

"ჩვენი მოლოდინია, რომ თუ ბრალდების მხარე დღეს მნიშვნელოვან მოწმეს წარმოადგენს, ის ისევე შეცვლის ჩვენებას, როგორც ეს აქამდე დაკითხულმა არაერთმა მოწმემ გააკეთა, ვინაიდან, გამოძიება აბსოლუტურად არასწორადაა წარმართული, სწორედ ეს განაპირობებს იმას, რომ მოწმეები ჩვენებებს ცვლიან", - განაცხადა ადვოკატმა.

ნინო ექვთიმიშვილი