პოლიტიკა

ხმაური მთაწმინდის საოლქო კომისიაში - „დემოკრატიული მოძრაობა“ მე-13 უბნის შედეგების გადათვლას ითხოვს

„დემოკრატიული მოძრაობა- თავისუფალი საქართველოს“ ლიდერებმა მთაწმინდის საოლქო საარჩევნო კომისიაში მივიდნენ, სადაც მე-13 საარჩევნო უბნის შედეგების გადათვლა მოითხოვეს.

ბლოკის წევრების მოთხოვნას საარჩევნო კომისიაში ხმაური მოჰყვა.

ბლოკის ლიდერებმა - კახა კუკავამ, დიმიტრი ლორთქიფანიძემ და გიორგი ახვლედიანმა განაცხადეს, რომ საარჩევნო ბლოკს ამ უბანზე პროპორციულ არჩევნებში ნული ხმა დაუწერეს, მაშინ, როდესაც 15 ადამიანი აცხადებს, რომ უბანზე მისვლისას ხმა „დემოკრატიულ მოძრაობა - თავისუფალ საქართველოს“ მისცა.

როგორც ჟურნალისტებთან საუბარში მთაწმინდის საარჩევნო ოლქის თავმჯდომარემ გიორგი ზირაქიშვილმა განაცხადა, შესაბამისი შინაარსის საჩივარი საარჩევნო უბანზე უნდა დაწერილიყო და ამის შემდეგ მოხდებოდა მისი განხილვა.

„აღნიშნული საჩივარი არ არის დაწერილი ნომერ მე-13 საარჩევნო უბანზე და კანონიდან გამომდინარე ეს საჩივარი რჩება განუხილველი“,- აღნიშნა საოლქო კომისიის თავმჯდომარემ.

„დემოკრატიული მოძრაობის“ ლიდერები საოლქო კომისიას არ ტოვებენ და კვლავ ითხოვენ ხმების ხელმეორე გადათვლას.

მონიკა დავლიანიძე