პოლიტიკა

ხელისუფლების წარმომადგენლებს ერთ-ერთ ტელევიზიაში „შპარგალკა“ დარჩათ მინაწერით - ,,პრეზიდენტი არის მავნებელი“ - ანა ნაცვლიშვილი

საპარლამენტო მდივანი ანა ნაცვლიშვილი პრეზიდენტ გიორგი მარგველაშვილის მიმართ გამოთქმულ მწვავე კრიტიკას ეხმაურება.

მისი თქმით, პრეზიდენტის წინააღმდეგ მიმდინარეობს შავი პიარკამპანია და მასში სახელისუფლებო წრეების სხვადასხვა განშტოებები არიან ჩართულნი.

„ჩვენ არაერთი შეტევა ვნახეთ პრეზიდენტზე სხვადასხვა საბაბით, მაგრამ ერთი საერთო სლოგანით, რომელიც ბოლოს ხელისუფლების წარმომადგენლების „შპარგალკით“ დაგვირგვინდა (რომელიც მათ ერთ-ერთ ტელევიზიაში დარჩათ) ტერმინით, რომ პრეზიდენტი არის მავნებელი. ეს „შპარგალკა“ აჩვენებს კარგად იმ შავ პიარს, რომელიც მიმდინარეობს.

ჯერ იყო სასახლის თემა. პერიოდულად იღვიძებს შეწყალებების თემა, ასევე სხვა თემები მათი გამაერთიანებლი არის, რომ მოხდეს შეტევა პრეზიდენტზე და მნიშვნელოვან სახელმწიფო ინსტიტუციებზე, რაც უპირველეს ყოვლისა ქვეყნის ინტერესებს აზიანებს“- განაცხადა ანა ნაცვლიშვილმა.

ნინო ექვთიმიშვილი