პოლიტიკა

ხელისუფლებას გააჩნია იმის სურვილი, რომ საწარმო არ დაიხუროს , იმუშავოს და მაქსიმალურად დაეხმაროს ბიზნესმენს - ბიძინა ივანიშვილი „ომეგა ჯგუფზე“

„ქართული ოცნების“ თავმჯდომარის, ბიძინა ივანიშვილის განცხადებით, ხელისუფლების სურვილია, რომ „ომეგა ჯგუფის“ საწარმო არ დაიხუროს. ასე უპასუხა მან, ვახო ხუზმიაშვილის შეკითხვას, რა გააკეთა ხელისუფლებამ იმისთვის, რომ შენარჩუნებულიყო დამოუკიდებელი მედიასაშუალება და რატომ არ მისცა საქართველოს ხელისუფლებამ „ომეგა ჯგუფს“ იმის საშუალება, რომ მომხდარიყო არსებული ვალის რესტრუქტურიზაცია.

„ მან [ზაზა ოქუაშვილმა] ხელისუფლებას რესტრუქტურიზაციის საშუალება არ მისცა. როცა ხელისუფლებამ უნდა გააკეთოს ვალების რესტრუქტურიზაცია, უნდა ჩანდეს ტენდენცია, ელემენტარული მაინც, რომ ის ცდილობს, შეამციროს დავალიანება, რომ მერე რესტრუქტურიზაცია გაკეთდეს. თუმცა ყველანაირი პრეცედენტია.

აბსოლუტურად სწორად მიმანიშნეთ იმაზე, რომ ხელისუფლების სურვილიც ეს უნდა იყოს, მას უნდა ჰქონდეს ამისი სურვილი, და გააჩნია, გარწმუნებთ, რომ საწარმო არ დაიხუროს , იმუშავოს და მაქსიმალურად დაეხმაროს ბიზნესმენს.

უამრავი მაგალითია იმის, რომ ჩამოაწერეს ძველი ვალები, რესტრუქტურიზაცია გაუკეთეს. ათასობით კომპანიაა, ციფრებიც კი მაქვს წამოღებული.

მე ამაზე ქვემოთ არ წავსულვარ, გარდა ფინანსთა მინისტრისა და თვითონ ოქუაშვილის განცხადებებისა, მე უფრო ღრმად არ შემისწავლია ეს საკითხი, მაგრამ დამოკიდებულებაში გეთანხმებით და გარწმუნებთ, რომ ესაა სახელმწიფოს სურვილი, რომ საწარმო არ გაჩერდეს, იქ ათას კაცზე მეტია დასაქმებული, 1300 თუ 1500 კაცი. რა თქმა უნდა, ეს ჩვენი დიდი სურვილია, მაგრამ შანტაჟით არა, უნდა აჩვენოს მან, რომ ბიუჯეტს პატივს სცემს, რომ ის გადამხდელია და გადაიხდის. ესაა, მეტი არაფერი არ არის“, - უპასუხა ივანიშვილმა ხუზმიაშვილს.