პოლიტიკა

ხელისუფლებამ გაასაჯაროვოს ყველა იმ სამხედროს მონაცემები, რომელთა შესახებ ინფორმაცია გადაეცა რუსეთს - ზაზა ბიბილაშვილი

ნაციონალური მოძრაობის განცხადებით, საქართველოს ხელისუფლება აქტიურად თანამშრომლობს ოკუპანტ სახელმწიფოსთან ქართველი მეომრების საწინააღმდეგოდ.

როგორც ბრიფინგზე პარტიის წევრმა ზაზა ბიბილაშვილმა განაცხადა, პარტიამ პარლამენტს მიმართა, რათა შეიქმნას საგამოძიებო კომისია,რომელიც მსგავს ფაქტებს შეისწავლის.

გარდა ამისა, ბიბილაშვილის თქმით, პარტია მოითხოვს ხელისუფლებისგან, რომ მან გაასაჯაროვოს ყველა იმ სამხედროს ვინაობა, რომელთა შესახებ ინფორმაცია რუსეთისთვის არის მიწოდებული.

„ხელისუფლება, აქტიურად თანამშრომლობს ოკუპანტ სახელმწიფოსთან ქართველი მეომრების და საქართველოს მოქალქეების საწინააღმდეგოდ. ჩვენ მივმართეთ პარლამენტს იმ მოთხოვნით, რომ შეიქმნას საგამოძიებო კომისია, რომელიც შეისწავლის ამ საკითხებს, ვინაიდან თვალნათელია ყველა ჩევნგანისთვის, რომ ამ ფაქტებმა მიიღო სისტემური ხასიათი. რაც ყველაზე მნიშვნელოვანია, პარალელურად ჩვენ გვსურს და მოვითხოვთ, კატეგორიულად მოვითხოთ საქართველოს ხელისუფლებისგან გაასაჯაროვოს ყველა იმ სამხედროს მონაცემები, სახელები და გვარები, რომელთა შესახებ ინფორმაცია გადაეცა რუსეთის ხელისუფლებას პირდაპირ ან ირიბად“,-აღნიშნა ბიბილაშვილმა.

მისი თქმით, უახლოეს დღეებში, პარტია წერილობით ინტერპოლს მიმართავს მოთხოვნით, რომ ქართველი სამხედროების წინააღმდეგ ძებნა და დევნა არ იყოს გამოცხადებული.

„ჩვენ ასევე წერილით მივმართავთ ინტერპოლს უახლოეს დღეებში და მოვითხოვთ, რომ ქართველი სამხედროების წინააღმდეგ არ იქნას გამოცხადებული დევნა და ძებნა, ვინაიდან ყველა ასეთი ქეისი არის პოლიტიკური, არის სამხედრო და სხვა მიზნებით მოტივირებული და ეწინააღმდეგება ინტერპოლის კონსტიტუციას“,-განმარტა ზაზა ბიბილაშვილმა.

მონიკა დავლიანიძე