პოლიტიკა

ხელისუფლებამ დაიწყოს პოლიტიკური ფორმატის საქართველო-ნატო-რუსეთის რეალიზაციისათვის სათანადო კომისიის შექმნა - ირმა ინაშვილი

პარლამენტის ვიცე-სპიკერმა, პატრიოტთა ალიანსის წევრმა ირმა ინაშვილმა საგანგებო ბრიფინგი გამართა და ხელისუფლებას რამდენიმე მოთხოვნით მიმართა.

,,საქართველოს პატრიოტების“ წევრი მმართველ გუნდს მოუწოდებს, დაიწყოს პირდაპირი დიალოგი რუსეთთან, სოხუმთან და ცხინვალთან და ახალი პოლიტიკური ფორმატის საქართველო-ნატო-რუსეთის რეალიზაცია მოახდინოს.

ინაშვილი ხელისუფლებას ასევე მიმართავს, რომ ყურადღება მიაქციონ მოშიმშილეებს. პატრიოტთა ალიანსის ლიდერი პარლამენტის წინ მიმდინარე აქციის მონაწილეების მოთხოვნებს ხელისუფლებას ახსენებს - შეჩერდეს საკონსტიტუციო უზურპაცია, შეწყდეს საარჩევნო სისტემის ხელყოფა, სოციალური შემწეობა აღუდგეს ყველას და გადაწყდეს უსახლკაროთა საცხოვრებელი პირობებით უზრუნველყოფის საკითხი.

მოთხოვნების შეუსრულებლობის შემთხვევაში პატრიოტთა ალიანსის ყველა წევრი მოშიმშილეებს შეუერთდება.

,,დაიწყოს პირდაპირი დიალოგი სოხუმთან, ცხინვალთან, რუსულ მხარესთან, რათა გამოვიდეთ მხოლოდ ლაპარაკის რეჟიმიდან და ქვეყნის მთლიანობის აღსადგენად გადადგას ხელისუფლებამ ქმედითი ნაბიჯები.

ჩვენ ვითხოვთ, ხელისუფლებამ დაიწყოს ახალი პოლიტიკური ფორმატის საქართველო-ნატო-რუსეთის რეალიზაციისათვის სათანადო კომისიის შექმნა.

საგულისხმოა, რომ შიმშილობის მე-17 დღეს ,,ქართული ოცნების“ ხელისუფლება კვლავ დუმილის რეჟიმშია“, - განაცხადა ირმა ინაშვილმა.