პოლიტიკა

ხელისუფლება ხშირად პირდაპირ ეხმარება რუსეთის რბილი ძალის გაძლიერებას ჩვენს სახელმწიფოში - სალომე სამადაშვილი

საპარლამენტო ოპოზიცია ფესტივალ „პაემანი რუსეთთან“ საქართველოში ჩატარების გამო ხელისუფლებას აკრიტიკებს და უმოქმედობაში ადანაშაულებს.

„ნაციონალური მოძრაობის“ ერთ-ერთი ლიდერის, სალომე სამადაშვილის განცხადებით, ხელისუფლება არ იყენებს ოკუპირებული ტერიტორიების შესახებ კანონს იმისთვის, რათა თავიდან იყოს აცილებული რუსული რბილი ძალის გაძლიერება.

„დღევანდელი ხელისუფლება არათუ ეფექტიანად არ იყენებს იმ საკანონმდებლო ჩარჩოს, რომელიც ჩვენ შევქმენით იმისთვის,რომ დავიცვათ ჩვენი უფლებები ოკუპაციის პირობებში, არამედ ხშირად პირდაპირ ეხმარება, მათ შორის, რუსეთის რბილი ძალის გაძლიერებას ჩვენს სახელმწიფოში“, - ამბობს სამადაშვილი.

„ევროპული საქართველოს“ წევრის, ირაკლი კიკნაველიძის განცხადებით, გაუგებარია პრინციპი, რომლის მიხედვით ხელისუფლება განსაზღვრავს, თუ ვინ შემოუშვას საქართველოში.

„ერთი მხრივ, მისასალმებელია, რომ ვინც ოკუპაციის კანონს არღვევდა, არ შემოუშვეს, მაგრამ მეორე მხრივ, გაუგებარია, რატომ შემოუშვეს ისინი, ვინც შემოსაშვები არ იყო, გაუგებარია რა პრინციპით მოქმედებს ხელისუფლება“, -ამბობს კიკნაველიძე.

საქართველოს შინაგან საქმეთა სამინისტრომ ქვეყანაში არ შემოუშვა რუსეთის სამი მოქალაქე, რომლებსაც მონაწილეობა უნდა მიეღოთ რუსული კინოს ფესტივალში „პაემანი რუსეთთან“. მათ შორისაა ე.წ. იუმორისტული კინოჟურნალის, „ერალაშის“ სამხატვრო ხელმძღვანელი ბორის გრაჩევსკი.