პოლიტიკა

ხე-ტყის უკანონოდ მოპოვებისა და ტრანსპორტირების ფაქტებზე კანონი გამკაცრდა

სატყეო სააგენტოს უფროსის მოადგილის, ნათია იორდანიშვილის განცხადებით, საქართველოს ადმინისტრაციულ სამართალდარღვევათა კოდექსსა და საქართველოს სისხლის სამართლის კოდექსში საკანონმდებლო ცვლილებები შევიდა.

მისი თქმით, ხე-ტყის შესაბამისი დოკუმენტების გარეშე დამზადებისა და ტრანსპორტირებისთვის გათვალისწინებული იყო ჯარიმა 2000 ლარის ოდენობით, ხოლო განმეორების შემთხვევაში – 5000 ლარი, ცვლილების შემდეგ კი განმეორებითი ქმედება პირდაპირ შეფასდება სისხლისსამართლებრივ დანაშაულად.

ნათია იორდანიშვილმა ასევე ისაუბრა იმაზე, რომ ეროვნული სატყეო სააგენტო პასუხისმგებელია თითქმის 1,8 მლნ. ჰექტარ ტყეზე, სააგენტოს პრიორიტეტებს წარმოადგენს ამ ტყეების დაცვა, მოვლა და შენარჩუნება და მდგრადი ტყით სარგებლობა, რაც, მათ შორის, ხე-ტყის დამზადებასაც მოიცავს.

„ტყეების დეგრადაციის სხვადასხვა კატეგორია განიხილება. მიზეზი მრავალია, პირველი, სამწუხაროდ, ყველგან ადამიანია; ასევე, კლიმატის ცვლილება, რომლის გავლენაც, ჩვენს ეპოქაში უკვე ხელშესახები და თვალსაჩინოა. ესენია: ტყის ხანძრების სიხშირე, ასევე მავნებელდაავადებები. ტყეს შეუძლია, კლიმატის ცვლილების პროცესი შეარბილოს და უკეთეს პირობებში გვამყოფოს, ვიდრე ისეთ ქვეყნებში, სადაც ტყით დაფარული ტერიტორიები დიდი არ არის“, – აღნიშნა ეროვნული სატყეო სააგენტოს უფროსის მოადგილემ, ნათია იორდანიშვილმა.

მისივე განცხადებით, სატყეო სააგენტო ახორციელებს მოვლით და სანიტარულ ჭრებს, რაც ტყის მდგომარეობის გაუმჯობესებისკენაა მიმართული. ეკონომიკური თვალსაზრისით გამოსაყენებელი მერქნული რესურსის მოპოვებაზე მნიშვნელოვანი წესი მოქმედებს, არ მოვიპოვოთ იმაზე მეტი, რაც ამ ბუნებრივი რესურსის განახლებას შეაფერხებს და დააზიანებს.