პოლიტიკა

ხათუნა სამნიძე თბილისის მერიას მოუწოდებს გადახედოს საბავშვო ბაგა-ბაღების სახელფასო პოლიტიკას

დედაქალაქის მუნიციპალიტეტის საკრებულოს ფრაქციის „რესპუბლიკელები“ თავმჯდომარემ ხათუნა სამნიძემ „თბილისის საბავშვო ბაგა-ბაღების“ სახელფასო პოლიტიკის თაობაზე ბრიფინგი გამართა.

ხათუნა სამნიძის განცხადებით, თბილისის საბავშვო ბაგა-ბაღების მართვის სააგენტოს თანამშრომელთა სარგო აღმზრდელთა საშუალო ხელფასს (დაახლოებით 500 ლარი) ოთხჯერ აღემატება და საშუალოდ 2 080 ლარს შეადგენს.

მისივე ინფორმაციით, 2017 წელს თბილისის საბავშვო ბაგა-ბაღების მართვის სააგენტოს თანამშრომელთა საპრემიო ფონდი 77 400 ლარით არის განსაზღვრული.

სამნიძის განცხადებით, სააგენტოს დირექტორსა და მის მოადგილეებზე ყოველთვიურად დანამატები გაიცემა, ხოლო დირექტორის ხელფასი კი. 5 750 ლარს შეადგენს.

„ჩვენ შევისწავლეთ ბაგა-ბაღების მართვის სააგენტოს სახელფასო პოლიტიკა, რომელმაც გვიჩვენა, რას ნიშნავს დავით ნარმანიასთვის ხარჯების ოპიტიმიზაცია, რომ ბაგა-ბაღების აღმზრდელების საშუალო ხელფასი 400-500 ლარია იმ დროს, როდესაც სააგენტოს დირექტორი და მისი მოადგილე ყოველთვიურად ხელფასთან ერთად დანამატს იღებენ და ეს თანხა საშუალოდ თვეში 5 750 ლარია“,- განაცხადა ხათუნა სამნიძემ.

ფრაქციის თავმჯდომარემ საბავშვო ბაღების მონიტორინგის ხისტ და, რიგ შემთხვევებში, ღირსების შემლახველ მეთოდებზეც ისაუბრა.

ფრაქცია „რესპუბლიკელები“ თბილისის მერიას მოუწოდებს, გადახედოს სახელფასო პოლიტიკას და ბიუროკრატიული სისტემის გაძლიერების ნაცვლად, აღმზრდელთა შრომის შესაბამის ანაზღაურებაზე იზრუნოს.