პოლიტიკა

ხატია დეკანოიძე საქართველოს პრეზიდენტს უშიშროების საბჭოს საგანგებო სხდომის გამართვისაკენ მოუწოდებს

„ერთიანი ნაციონალური მოძრაობის“ წევრი ხატია დეკანოიძე საქართველოს პრეზიდენტს მიმართავს, რომ გიორგი მარგველაშვილმა მოიწვიოს უშიშროების საბჭოს გაფართოებული სხდომა.

ამის შესახებ დეკანოიძემ დღევანდელ ბრიფინგზე განაცხადა.

როგორც ენმ-ის წევრმა აღნიშნა, მოწვევის ერთ-ერთი მიზეზია ძალოვანი უწყებების მიერ უკანონოდ მოპოვებული ჩანაწერია, რომელიც გამოყენებულია გენერალური აუდიტორის ლაშა თორდიას დასაშანტაჟებლად.

„მნიშვნელოვანი სახელმწიფო ინსტიტუტები, რომელთა უშუალო მოვალეობა სახელმწიფო უსაფრთხოებაზე ზრუნვაა, გენერალური აუდიტორის შანტაჟში პირდაპირ არიან ჩართულები, ასევე კორუფციასა და სხვა დანაშაულში, ძალოვანი სტრუქტურების არაფორმალურ მმართველობაში მხილებული ფარცხალაძის გამართლებაში.

ყოველივე ამის გათვალისწინებით, „ერთიანი ნაციონალური მოძრაობა“ სთხოვს პრეზიდენტს, მოიწვიოს უშიშროების საბჭოს გაფართოებული სხდომა, ვინაიდან ის სახელმწიფო ინსტიტუციები, რომლებიც სახელმწიფო უსაფრთხოებაზე უნდა ზრუნავდნენ, უკვე ჩამოიშალა. ეს სხდომა უახლოეს პერიდოში უნდა იყოს მოწვეული პოლიტიკური პარტიების მონაწილეობით“, - განაცხადა დეკანოიძემ.

ანა მებურიშვილი