პოლიტიკა

ხანძრის ლიკვიდაციაში მონაწილე ყველა ადამიანს მადლობას ვუხდი - ირაკლი კობახიძე

საქართველოს პარლამენტის თავმჯდომარემ, ირაკლი კობახიძემ ბორჯომის ხეობაში მიმდინარე სახანძრო-სამაშველო სპეცოპერაციაში მონაწილე ყველა ადამიანს მადლობა გადაუხადა. კობახიძემ ასევე აღნიშნა თურქეთის, აზერბაიჯანის, ბელორუსისა და სომხეთის წვლილი ხანძრის სალიკვიდაციო სამუშაოებში.

„ვისარგებლებ შემთხვევით და კიდევ ერთხელ გადავუხდი მადლობას მაშველებს. მადლობას გადავუხდი ასევე, ყველა იმ ადამიანს, რომელიც არის ჩართული ხანძრის ლიკვიდაციაში. განსაკუთრებული მადლობა მინდა გადავუხადო ჩვენი სამხედრო ძალების წარმომადგენლებს, გუშინ ჩაერთნენ შესაბამის ოპერაციებში და ძალიან სწრაფად მოხერხდა გორის მუნიციპალიტეტში ხანძრის ლიკვიდაცია.

მადლობა მინდა გადავუხადო ასევე ჩვენს მეგობარ ქვეყნებს, რომლებიც გვეხმარებიან, უპირველეს ყოვლისა, ტექნიკით. ფასდაუდებელია მათი დახმარება. აზერბაიჯანმა, სომხეთმა, თურქეთმა და ბელორუსმა გაგვიწიეს ნამდვილად ფასდაუდებელი დახმარება.

მადლობა მინდა გადავუხადო თითოეულ დეპუტატს, ვინც აქ არის წარმოდგენილი. პრაქტიკულად ყველა დეპუტატი, რომელიც იყო საქართველოში, ესწრება დღევანდელ სხდომას და ნამდვილად მისასალმებელია ის ერთსულოვნება, რომელიც დაფიქსირდა. მადლობას ვუხდი როგორც საპარლამენტო უმრავლესობას, ასევე, საპარლამენტო უმცირესობას“, - განაცხადა პარლამენტის თავმჯდომარემ საკანონმდებლო ორგანოს რიგგარეშე სხდომაზე.

შეგახსენებთ, საქართველოს პარლამენტმა ერთხმად (116 ხმით) მხარი დაუჭირა პრეზიდენტის აქტს ბორჯომის ხეობაში საგანგებო სიტუაციაზე რეაგირების მიზნით, საქართველოს სამხედრო ძალების გამოყენების შესახებ.

კენჭისყრა რამდენიმე წუთის წინ დასრულდა.

დღეს პარლამენტის რიგგარეშე სხდომაზე მხოლოდ ეს საკითხი განიხილებოდა. გუშინ საქართველოს პრემიერ-მინისტრმა გიორგი კვირიკაშვილმა საქართველოს პრეზიდენტს, გიორგი მარგველაშვილს ქვეყნის რეგიონებში გაჩენილი ხანძრის ლიკვიდაციის მიზნით, „სამხედრო ძალების გამოყენების წარდგინებით“ მიმართა.

ბორჯომის ხეობაში ხანძარი 20 აგვისტოს გაჩნდა. ამ ეტაპზე ცეცხლი ლოკალიზებულია და დარჩენილია რამდენიმე კერა.

ანა მებურიშვილი