პოლიტიკა

ხალხისგან მიღებული მხარდაჭერა მათი პრობლემების მოგვარებაში უნდა გამოიხატოს - პრეზიდენტი თვითმმართველობის არჩევნებზე

„არჩევნები შედგა“,- ასე გამოეხმაურა საქართველოს პრეზიდენტი გიორგი მარგველაშვილი ადგილობრივი თვითმმართველობის არჩევნებს. მან ხაზი გაუსვა, რომ ბევრი ხარვეზი იყო, რომლის გამოსწორება მნიშვნელოვანია ქართული დემოკრატიის განვითარებისთვის.

„საქართველოში 2017 წლის თვითმმართველობის არჩევნები შედგა. საერთო ჯამში, არჩევნებმა მშვიდ ვითარებაში ჩაიარა, თუმცა იყო ბევრი ხარვეზი, რომელთა აღმოფხვრაც და გათვალისწინებაც ქართული დემოკრატიისთვის ძალიან მნიშვნელოვანია.

ვულოცავ თვითმმართველ ქალაქებში არჩეულ მერებს, პარტიებსა და მაჟორიტარ კანდიდატებს. ვუსურვებ წარმატებულ საქმიანობას, არჩევნებში მიღებული ხალხის მხარდაჭერა კი, ამ ხალხის პრობლემების მოგვარებაში უნდა გამოიხატოს.

მინდა, მადლობა ვუთხრა საერთაშორისო და ადგილობრივ სადამკვირვებლო მისიებს თვითმმართველობის არჩევნების მიმართ გამოჩენილი მაღალი ინტერესისა და კვალიფიციური მონიტორინგისათვის.

იმედს გამოვთქვამ, რომ არჩევნების მეორე ტურიც მშვიდ ვითარებაში ჩაივლის და ამომრჩევლის აქტივობაც მაღალი იქნება“, - ნათქვამია პრეზიდენტის განცხადებაში.

შეგახსენებთ, ადგილობრივი თვითმმართველობის არჩევნები 21 ოქტომბერს ჩატარდა. ამომრჩეველთა აქტივობა 45.6% შეადგინა.

ანა მებურიშვილი