პოლიტიკა

ხადას ხეობაში მომხდარ მკვლელობაში ბრალდებული მალხაზ კობაურის ადვოკატი საქმეს ჩამოშორდა

ხადას ხეობაში სმითების ოჯახის მკვლელობაში ბრალდებული მალხაზ კობაურის ადვოკატი დავით გირგვლიანი საქმეს ჩამოშორდა. ამის შესახებ მან ფეისბუკის საკუთარ გვერდზე დაწერა.

უფლებადამცველს კონკრეტულად არ განუმარტავს, რა გახდა ამ გადაწყვეტილების მიზეზი.

„საზოგადოების წინაშე თავს ვალდებულად ვთვლი, გავაკეთო შემდეგი განცხადება!

ხადას ხეობაში მომხდარი ტრაგედიის საქმეზე მე ვიცავდი ბრალდებულ მალხაზი კობაურის ინტერესებს.

ამ საქმეში ჩავერთე იმიტომ,რომ დამედგინა ჭეშმარიტება, ვინაიდან არასოდეს არ მოვრიდებივარ სისტემის წინააღმდეგ ბრძოლას, მუდამ ვიბრძოდი და კვლავაც გავაგრძელებ ბრძოლას სამართლიანობისათვის, თუმცა, რაც შეეხება ხადას ხეობაში მომხდარი ტრაგედიის საქმეს, მე ,როგორც თავისუფალი პროფესიის წარმომადგენელი ადვოკატი მივიჩნევ, რომ აღნიშნული საქმე უნდა გაგრძელდეს ჩემი მონაწილეობის გარეშე.

წარმატებას ვუსურვებ ჩემს კოლეგას ან/და კოლეგებს, ვინც გააგრძელებს მის დაცვას, ვინაიდან ყველა ადამიანს აქვს დაცვის უფლება, მიუხედავად ბრალად წარდგენილი დანაშაულის სიმძიმისა, თუმცა მე მივიჩნევ, რომ აღნიშნული პროცესი უნდა გაგრძელდეს ჩემ გარეშე!

ყველას მინდა, დიდი მადლობა გადავუხადო როგორც თბილი სიტყვებისათვის, ასევე კრიტიკული ოპონირებისათვის.

მე აღარ ვაგრძელებ აღნიშნული საქმის წარმოებას,თუმცა ვრჩები ჩემი პროფესიისა და სიმართლის ერთგული!

სხვა რაიმე კომენტარს აღნიშნულ საქმეზე აღარ გავაკეთებ!“, -დაწერა ადვოკატმა.

ცნობისთვის, ტელევიზიებით გავრცელდა სამხარაულის ექსპერტიზის ეროვნული ბიუროს დასკვნა, რომლის მიხედვით ხეობაში მოკლული ლორა სმითის სხეულიდან ამოღებულია მალხაზ კობაურის გენეტიკური პროფილი, რაც სექსუალურ კავშირზე მიანიშნებს. გამოძიება ლორა სმიტის გაუპატიურების ვერსიაზე მუშაობს.