საზოგადოება

კენიის პარლამენტში ივანიშვილის ბაობაბების საქმეზე გამოძიება დაიწყეს

კენიის ეროვნული ასამბლეის გარემოს დაცვის, სატყეო და სამთო კომიტეტის წევრებმა ბიძინა ივანიშვილისთვის ბაობაბების მიყიდვის საქმეზე გამოძიება დაიწყეს.

ადგილობრივი მედიის ცნობით, ამ მიზნით, ასამბლეის წევრებმა უკვე დაიბარეს გარემოს მართვის ეროვნული სააგენტოს მცენარეთა ინსპექტირების სამსახურის და კენიის სატყეო სამსახურის წარმომადგენლები.

მედიის განცხადებით, გარემოს დაცვის კომიტეტზე ითქვა, რომ პროცესში ჩართული სახელმწიფო სააგენტოები ცდილობენ, დეტალები დამალონ და უკანონობა მიჩქმალონ. მათივე განცხადებით, სააგენტოებმა არ დაიცვეს კონსტიტუციით გარანტირებული უფლება, რომ ამ ტიპის გადაწყვეტილებამდე ხელისუფლებამ მოლაპარაკება ადგილობრივებთან უნდა აწარმოოს და პროცესში მათი რჩევები და წუხილები გაითვალისწინოს.

კომიტეტის თავმჯდომარის თქმით, დადგება ყველა იმ პირის პასუხისმგებლობის საკითხი, ვინც პროცედურები დაარღვია და ინფორმაციის დამალვას ცდილობს. ადგილობრივი მედიის ინფორმაციით, ბაობაბებს კენიის ტერიტორია ჯერ არ დაუტოვებიათ.

წყარო: "ფორმულა"