მსოფლიო

კატალონიის პრეზიდენტმა დამოუკიდებლობის დეკლარაციას ხელი მოაწერა, თუმცა დამოუკიდებლობსი გამოცხადება გადადო

კატალონიის პრეზიდენტმა კარლეს პუიჩდემონმა და ადგილობრივი მთავრობის წარმომადგენლებმა ხელი მოაწერეს რეგიონის დამოუკიდებლობის დეკლარაციას, თუმცა რეგიონის ლიდერმა გადადო მისი იმპლემენტაცია ოფიციალურ მადრიდთან მოლაპარაკებების დასაწყებად. ამის შესახებ ბიბისი წერს.

კატალონიის პარლამენტისადმი მიმართვისას პუიჩდემონმა განაცხადა, რომ კატალონიელებმა რეფერენდუმის შედეგად დამოუკიდებლობის უფლება მოიპოვეს.

„ჩვენ მოვუწოდებთ საერთაშორისო ორგანიზაციებსა და სახელმწიფოებს, აღიარონ კატალონიის რესპუბლიკა დამოუკიდებელ სუვერენულ სახელმწიფოდ“, -მიმართა პუიჩდემონმა საერთაშორისო საზოგადოებას.

მან აღნიშნა, რომ კატალონიელებს მადრიდისგან გამოყოფა სურს, თუმცა იქვე დასძინა, რომ სიტუაციის დეესკალაციის მომხრეა.

„გთავაზობთ, შევაჩეროთ დამოუკიდებლობის შესახებ დეკლარაციის ამოქმედება, რათა უახლოეს კვირებში დავიწყოთ მოლაპარაკებები, რომლის გარეშე შეუძლებელია შეთანხმების მიღწევა“, -აღნიშნა პუიჩდემონმა.

მადრიდი უკვე გამოეხმაურა პუიჩდემონის მიმართვას. ესპანეთის მთავრობის თავმჯდომარის მოადგილემ სორაია საენზმა გამორიცხა მოლაპარაკებების დაწყება პუიჩდემონთან საერთაშორისო მედიატორის მონაწილეობით.

„არც პუიჩდემონს, არც ვინმე სხვა არ შეუძლია თავზე მოგვახვიოს მედიაცია“, -თქვა საენზმა.

თვითონ კატალონიის პრეზიდენტი საენზმა აღწერა, როგორც პირი, რომელმაც „არ იცის, სადაა, სად მიდის და ვისთან ერთად“. მისივე თქმით, პუიჩდემონმა კატალონიელები ისტორიაში „დაძაბულობისა და გაუგებრობის უმაღლეს ზღვრამდე მიიყვანა“.

უახლოეს დღეებში ქვეყნის პრემიერ-მინისტრმა მარიანო რეხოიმ საგანგებო სხდომა უნდა მოიწვიოს მთავრობის სამომავლო გეგმებზე სალაპარაკოდ.

პუიჩდემონის პოზიციის მიუხედავად ბარსელობას მერმა ადა კოლაუმ და ევროპული საბჭოს პრეზიდენტმა დონალდ ტუსკმა მას უკან დახევისკენ მოუწოდეს.

ევროკავშირმაც დააფიქსირა, რომ ესპანეთისგან გამოყოფის შემთხვევაში კატალონიას არ აღიარებს.

შეგახსენებთ, კატალონიაში რეფერენდუმი 1-ელ ოქტომბერს გაიმართა. ხმის მისაცემად საარჩევნო უბნებში დარეგისტრირებულ ამომრჩეველთა 42.3% გამოცხადდა, რომელთა 90%-მა მხარი დაუჭირა რეგიონის დამოუკიდებლობას.

ანა მებურიშვილი