პოლიტიკა

„კარვებით ვიცავთ თავისუფლებას!“ - დღეს 20 საათზე რუსთაველის გამზირზე შვილმოკლული მამების მხარდამჭერი აქცია გაიმართება

დღეს 20 საათზე რუსთაველის გამზირზე, საქართველოს პარლამენტთან შვილმოკლული მამების, ზაზა სარალიძისა და მალხაზ მაჩალიკაშვილის მხარდამჭერი აქცია „კარვებით ვიცავთ თავისუფლებას!“ გაიმართება.

ორგანიზატორები მოუწოდებენ მოსახლეობას, მივიდნენ რუსთაველის გამზირზე, რათა გააპროტესტონ შსს-ის მიერ სარალიძესა და მაჩალიკაშვილისთვის კარვის გაშლის უფლების განხორციელების ხელშეშლა და მერიის გადაწყვეტილება, რომლის თანახმად, 7 დეკემბრის შემდეგ შვილმოკლულმა მამებმა აქციის ჩასატარებლად ლოკაცია უნდა შეცვალონ.

„საქართველოს ხელისუფლება საქართველოს კონსტიტუციისა და კანონმდებლობის მოთხოვნათა უგულვებელყოფით ზაზა სარალიძესა და მალხაზ მაჩალიკაშვილს საპროტესტო აქციაზე კარვის გაშლის საშუალებას დღემდე არ აძლევს. სწორედ ამიტომ, 10 ნოემბერს, 20:00 საათზე საქართველოს პარლამენტის შენობასთან გაიმართება მათი მხარდასაჭერი აქცია — „კარვებით ვიცავთ თავისუფლებას!“.

ჩვენ, არასამთავრობო ორგანიზაციებმა, ისევე როგორც საქართველოს სახალხო დამცველმა, არაერთხელ გავაკეთეთ მკაფიო განცხადებები, რომლის მიხედვითაც, შინაგან საქმეთა სამინისტროს მხრიდან აქციის მონაწილეთათვის დროებითი კონსტრუქციის (კარვის) გაშლის ხელშეშლა საქართველოს კონსტიტუციისა და მოქმედი კანონმდებლობის უხეშ დარღვევად და მშვიდობიანი შეკრების უფლებაში გაუმართლებელ ჩარევად შევაფასეთ.

სახელმწიფოს მხრიდან ადამიანის უფლებათა აბუჩად აგდებასა და საკითხისადმი არასერიოზულ დამოკიდებულებაზე მიუთითებს, წერილი, რომლითაც ზაზა სარალიძეს შეატყობინეს, რომ 7 დეკემბრიდან აქციის მონაწილეებმა ლოკაცია შეცვალონ, რადგან რუსთაველის გამზირზე ნაძვის ხის დადგმა იგეგმება.

შექმნილი მდგომარეობის გათვალისწინებით, მნიშვნელოვანია, ადამიანებმა საკუთარი აქტიურობით დაიცვან კონსტიტუციური უფლებები და ამით მკაფიო შეტყობინება გაუგზავნონ ხელისუფალს. აქციის ორგანიზატორმა არასამთავრობო ორგანიზაციებმა გადავწყვიტეთ, ჩვენი პროტესტი ხელისუფლებისადმი და სოლიდარობა შვილმკვდარი მამებისადმი ამ ფორმით გამოვხატოთ და მოგიწოდებთ თითოეულ მოქალაქეს, შემოგვიერთდეთ“, - წერია აქციის ფეისბუკგვერდის აღწერაში.

აქციის ორგანიზატორები არიან არასამთავრობო ორგანიზაციები „საფარი“, „სამართლიანი არჩევნები“, „საქართველოს ახალგაზრდა იურისტთა ასოციაცია“, „კონსტიტუციის 42-ე მუხლი“, „საერთაშორისო გამჭვირვალობა-საქართველო“ და „საქართველოს დემოკრატიული ინიციატივა“.

გუშინ ზაზა სარალიძემ და მალხაზ მაჩალიკაშვილმა მერიის წერილი წარადგინეს, სადაც წერია, რომ მათ საახალწლო სამზადისის გამო 7 დეკემბრის შემდეგ რუსთაველის გამზირი უნდა დატოვონ. შვილმოკლული მამების თქმით, ისინი ტერიტორიის დატოვებას არ აპირებენ.