სამართალი

კანონში პირდაპირ წერია, რომ ის ბრალი, რაც ლევან ხაბეიშვილს წაუყენეს, არის შეთითხნილი და პოლიტიკურად მოტივირებული - ადვოკატი

„ნაციონალური მოძრაობის“ პოლიტსაბჭოს თავმჯდომარის, ლევან ხაბეიშვილის ადვოკატის, ლაშა ტყეშელაძის განცხადებით, კანონში პირდაპირ წერია, რომ ის ბრალი, რაც ლევან ხაბეიშვილს წაუყენეს, არის შეთითხნილი და პოლიტიკურად მოტივირებული.

როგორც ლაშა ტყეშელაძემ დღევანდელ ბრიფინგზე აღნიშნა, იმ ადამიანებს, ვინც დღეს კანონს არღვევენ, აუცილებლად მოუწევთ პასუხისგება.

„საქართველოს ორგანული კანონი „მოქალაქეთა პოლიტიკური გაერთიანების შესახებ“ პირდაპირ ამბობს, რომ ის ბრალი, რაც ლევან ხაბეიშვილს წაუყენეს, არის შეთითხნილი. ის ბრალი, რაც ლევან ხაბეიშვილს წაუყენეს, არის პოლიტიკური და გამოგონილი. მინდა კანონიდან წავიკითხო ციტატა, სადაც პირდაპირ წერია: „დაპირებასთან დაკავშირებული აკრძალვა არ შეეხება პოლიტიკურ და საარჩევნო დაპირებებს, რომლებიც უკავშირდება საბიუჯეტო სახსრების სამომავლო განაწილებას და სახელმწიფო პოლიტიკის სამომავლო განხორციელებას“. ამ კანონიდან პირდაპირ ჩანს, რომ ლევან ხაბეიშვილის მიმართ პოლიტიკური დავალება, რომელიც „ქართული ოცნების“ პარტიამ გასცა, მთავარმა პროკურორმა პირდაპირ შეასრულა, რაც არის სისხლის სამართლის დანაშაული, რადგან არ არსებობს კანონი, რომ ლევან ხაბეიშვილისთვის ბრალი წაეყენებინათ.

საქართველოს დამოუკიდებლობის ისტორიაში პირველად მოხდა, რომ პოლიტიკური დაპირების გამო ადამიანი დაეკავებინათ და ბრალი წაეყენებინათ. სხვადასხვა ინტერპრეტაციები მოჰყვა პროკურატურისგან, პოლიტიკოსებისგან, ე.წ. იურისტებისგან და მე დღეს მოვიტანე განცხადება, კანონი. დავუტოვებ პროკურატურას, როდესაც თავისუფალი ადამიანები გაიმარჯვებენ, მერე არავინ თქვას, რომ ეს კანონი არავის ჰქონდა წაკითხული. ყველა სამართალდამრღვევს ვეტყვი, რომ თქვენთან აუცილებლად მოვა კანონი და სამართალი, როდესაც თავისუფალი ადამიანები გაიმარჯვებენ და ნუღარ შეასრულებთ პოლიტიკურ დავალებებს“, - განაცხადა ლაშა ტყეშელაძემ.

ცნობისთვის, ლევან ხაბეიშვილს ბრალი 2 მუხლით აქვს წარდგენილი. ოპოზიციონერ ლიდერის 339-ე მუხლის მეორე ნაწილს ედავებიან, რაც მოხელისთვის ქრთამის დაპირებას გულისხმობს. მას ასევე ბრალი წარედგინა სისხლის სამართლის კოდექსის 317 მუხლით, რაც პროკურატურის მტკიცებით, საქვეყნოდ ხელისუფლებოს დამხობაზე მოწოდებას გულისხმობს.

სახელმწიფო უსაფრთხოების სამსახური დადგენილებაში წერს, რომ ლევან ხაბეიშვილს პაემნის, მიმოწერისა და სატელეფონო საუბრის უფლება ეკრძალება.