პოლიტიკა

კანონპროექტი არის ნაბიჯი წარსულში- ეკა ბესელია

პარლამენტის დეპუტატის, ეკა ბესელიას განცხადებით, საპარლამენტო უმრავლესობა ცდილობს, რომ ხელის გადაგრეხვის პრინციპითა და დაჩქარებული წესით მიიღოს კობახიძის კაბინეტის მიერ მომზადებული კანონპროექტი, რომელიც უზენაესი სასამართლოს მოსამართლეების არჩევის საკითხს უკავშირდება.

ბესელიას თქმით, გაუგებარია, თუ კანონპროექტი ვენეციის კომისიას გადაეგზავნა და მის დასკვნას ელოდებიან, რატომ დანიშნა მმართველმა გუნდმა კვირის ბოლოს კომიტეტის სხდომა, სადაც საკითხს განიხილავენ.

„ასეთი პრაქტიკა არ არსებობს და რით არის განპირობებული არასამუშაო დღეს ასეთი მნიშვნელოვანი საკითხის განხილვა, როგორიც არის მოსამართლეთა არჩევის წესი და პროცედურა. ეს განმარტება უნდა გააკეთოს კომიტეტმა. მიმაჩნია, რომ ეს არის ძალიან ცუდი გზავნილი, რაც ასახსნელია. ვენეციის კომისიის დასკვნას ან მოსაზრებებს თუ ელოდება პარლამენტის უმრავლესობა, მაშინ დაველოდოთ ამ დასკვნას.

კანონპროექტი, რომელიც პარლამენტის თავმჯდომარის კაბინეტის ავტორობით არის სახელდებული, რატომ არის ასეთი არადემოკრატიული პრინციპების, რატომ არის ნათქვამი ტყუილი, თითქოს ეს არის ამერიკული მოდელი, მაშინ როცა პროცედურაც კი არ არის გაწერილი, იურიდიული კომიტეტი კანდიდატებს როგორ მოუსმენს და თურმე, ეს უნდა გადაწყვიტოს მხოლოდ კომიტეტის თავმჯდომარემ კომიტეტის უმრავლესობასთან“, – აცხადებს ეკა ბესელია.

„თუ ვინმეს აქვს იმის განცდა, რომ ეს პროცესი ფორსირებულად, ჩქარა და ხელის გადაგრეხვის პრინციპით იქნება ბოლომდე მიყვანილი, ძალიან ცდება,“ - ამბობს ბესელია.

მისი თქმით, კანონპროექტი არის ნაბიჯი წარსულში.

„ამ კანონპროექტში პირდაპირ წერია, რომ მხოლოდ სააკაშვილის პერიოდის მოსამართლეებს აქვთ უპირატესობა სხვა კანდიდატებთან შედარებით. აი, ეს არის ის პროექტი, რასაც გვთავაზობენ საბჭოს უმრავლესობა, მოსამართლეთა ჯგუფი და კობახიძე“, – განაცხადა ეკა ბესელიამ.

ამასთან, ეკა ბესელია აცხადებს, რომ ვენეციის კომისიას კანონპროექტის საკუთარ ვერსიასაც გადაუგზავნის.

ვენეციის კომისიის პრეზიდენტმა, ჯანი ბუკიკიომ განაცხადა, რომ მოსამართლეთა უვადოდ დანიშვნა მკაფიო და გამჭვირვალე კრიტერიუმებსა და პროცედურებზე დაყრდნობით აუცილებელია სასამართლო სისტემის დამოუკიდებლობისთვის. ამასთან, ჯანი ბუკიკიომ განაცხადა, რომ კომისია სწრაფად შეასრულებს საქართველოს პარლამენტის თავმჯდომარის, ირაკლი კობახიძის თხოვნას, მოსაზრება გამოთქვან უზენაესი სასამართლოს მოსამართლეების დანიშვნის საკითხთან დაკავშირებით.