პოლიტიკა

კანონით გათვალისწინებულ 10-დღიან ვადაში გადავწყვეტთ, ხელი მოვაწეროთ ე.წ ფარული მოსმენების კანონს თუ შენიშვნების სახით დავუბრუნოთ პარლამენტს - ანა დოლიძე

პრეზიდენტის საპარლამენტო მდივნის, ანა დოლიძის განცხადებით, პრეზიდენტს პარლამენტის მიერ დამტკიცებული ე.წ. მოსმენების კანონი ჯერ არ მიუღია.

დოლიძის თქმით, რეგლამენტით პრეზიდენტს 10 დღე იძლევა კანონის გასაცნობად, რომლის შემდეგ ის თავის პოზიციას დააფიქსირებს.

„ეს 10-დღიანი ვადა აითვლება მას შემდეგ, რაც უკვე მესამე მოსმენით მიღებული კანონი შემოვა ჩვენთან. შესაბამისად, ჩვენ ვაპირებთ, რომ სწორედ საქართველოს კონსტიტუციით დადგენილი უფლებამოსილების ფარგლებში ვიმოქმედოთ. 10 დღის ვადაში, მას შემდეგ, რაც კანონი შემოვა ჩვენთან, გადავწყვიტოთ ხელს ვაწერთ მას, თუ ჩვენ მიერ ჩამოყალიბებული მოსაზრებების შესაბამისად მოტივირებული შენიშვნებით ვუბრუნებთ უკან“, - განაცხადა ანა დოლიძემ.

შეგახსენებთ, რომ გუშინ პარლამენტმა რიგგარეშე სხდომაზე მესამე და საბოლოო მოსმენით მიიღო ე.წ. ფარული მოსმენების შესახებ კანონი. საკონსტიტუციო ცვლილებათა პაკეტს 87-მა დეპუტატმა დაუჭირა მხარი, ხოლო 2-მა პარლამენტარმა ამ კანონის წინააღმდეგ მისცა ხმა.

აღნიშნულ კანონპროექტზე მუშაობა მას შემდეგ გახდა საჭირო, რაც 2016 წლის 14 აპრილს საკონსტიტუციო სასამართლომ ფარული მოსმენების არსებული წესი არაკონსტიტუციურად ცნო. სასამართლომ პარლამენტს დააკისრა ცვლილებების შეტანის ვალდებულება 2017 წლის 31 მარტამდე.

ანა მებურიშვილი