პოლიტიკა

კანაფის კულტივაციის საკანონმდებლო პაკეტის გაწვევა პარლამენტის პრეროგატივა არ არის - თამარ ჩუგოშვილი

პარლამენტის ბიუროს სხდომაზე კანაფის კულტავაციის საკანონმდებლო პაკეტის გაწვევის საკითხი განიხილეს.

საბოლოოდ ითქვა, რომ აღნიშნული კანონპროექტის გაწვევა პარლამენტის პრეროგატივა არ არის, რადგან ის მთავრობის მიერ არის ინიცირებული.

პროექტის გაწვევის საკითხი ბიუროს სხდომაზე ჯანდაცვის კომიტეტის თავმჯდომარემ აკაკი ზოიძემ დასვა, რომელმაც ბიუროს მიაწოდა ინფორმაცია, რომ კომიტეტის წევრებს აქვთ პოზიცია პროექტის გაწვევის შესახებ.

ჯანდაცვის კომიტეტი “კანაფის კონტროლის შესახებ“ საკანონმდებლო პაკეტზე წამყვანი კომიტეტია. ზოიძემ დღეს წამყვანი კომიტეტის შეცვლაც მოითხოვა და როგორც აღნიშნა, კანონპროექტი თავისი არსითა და შინაარსით ჯანდაცვითი ინიციატივა არ არის და ეკონომიკური პროექტია.

“ღიად არის დარჩენილი საკითხი, რაც გარკვეულ ნეგატიურ დამოკიდებულებას იწვევს. არის დამატებითი ახსნა-განმარტებები, რომ აქ ქვეყნისთვის საზიანო არაფერი კეთდებოდა. პირიქით, მხოლოდ სასარგებლო და სარგებელი აჭარბებს რისკებს. ეს თემები არ არის გახსნილი და ჩვენ ამომრჩეველზე ნეგატიურად მოქმედებს“, - განაცხადა აკაკი ზოიძემ.

ზოიძის პასუხად პარლამენტის დარგობრივი ეკონომიკური კომიტეტის თავმჯდომარემ რომან კაკულიამ აღნიშნა, რომ მისი პირადი პოზიციაა, რომ პროექტი გაწვეული უნდა იყოს პარლამენტიდან.

ბიუროს სხდომის წამყვანმა თამარ ჩუგოშვილმა კოლეგებს აღნიშნულ თემაზე პარლამენტის თავმჯდომარესთან კონსულაციების გავლა შესთავაზა.

“წამყვანი კომიტეტის შეცვლა ის პრაქტიკა არ არის, რასაც პარლამენტი იყენებს. დამატებითი კონსულტაცია პარლამენტის თავმჯდომარესთან გავიაროთ და შემდეგ მივიღოთ ეს გადაწყვეტილება. პროექტის გაწვევის უფლება აქვს მხოლოდ პროექტის ინიციატორს, რომელიც არის მთავრობა. პროექტს ჩვენ ვერ გავიწვევთ. კომიტეტის შეცვლაზე მოგვიანებით ვიმსჯელოთ“, - განაცხადა ჩუგოშვილმა ბიუროს სხდომაზე.