პოლიტიკა

კალაძეს არ აქვს არანაირი პასუხი იმაზე, რატომ დატოვა საკვანძო თანამდებობებზე ნარმანიას გუნდი - გოკა გაბაშვილი

ევროპული საქართველოს წევრის, გოკა გაბაშვილის ინფორმაციით, თბილისის მერი, კახა კალაძე არ აპირებს დღეს საკრებულოში მისვლას, სადაც მის მიერ წარდგენილი დედაქალაქის მთავრობის ახალი წევრები უნდა დაამტკიცონ.

როგორც გოკა გაბაშვილმა დღევანდელ ბრიფინგზე განაცხადა, კალაძეს იმ კითხვებისგან თავის არიდება სურს, რომელიც მის მიერ შერჩეულ მთავრობის წევრებს ეხება.

,,კახა კალაძე დღეს საერთოდ არ მოვა თბილისის საკრებულოში. თბილისის საკრებულოში მთავრობას წარადგენს ჯერ კიდევ დაუმტკიცებელი მისი მოადგილე, ბატონი ხმალაძე, რომელთანაც არანაირი პერსონალური პრეტენზია არ მაქვს, მაგრამ გასაოცარია, როდესაც თბილისის მერისა და საკრებულოს ურთიერთობა ასე იწყება.

ეს მიანიშნებს ერთადერთ რაღაცაზე, კალაძეს არ აქვს არანაირი პასუხი იმაზე, რატომ დატოვა საკვანძო თანამდებობებზე ნარმანიას გუნდი“, - აცხადებს გოკა გაბაშვილი.

თავის მხრივ, როგორც საკრებულოს უმრავლესობაში განმარტავენ, კალაძეს არ აქვს რეგლამენტით ვალდებულება პირადად გამოცხადდეს საკრებულოში და უფლებამოსილია წერილობით წარადგინოს დედაქალაქის მთავრობის ახალი წევრები.

,,ამას ითვალისწინებს პროცედურა, რომ მერი ოფიციალურად წერილობით წარადგენს საკრებულოში კანდიდატებს, თანამდებობის პირებს, ხოლო მისი მოსვლა საკრებულოში რეგლამენტით გათვალისწინებული არ არის. შესაბამისად, ეს არის ნორმალური პროცესი. თქვენ ვერ გამახსენებთ ვერცერთ ფაქტს, როცა თანამდებობის პირის წარდგენა ხდებოდა მერის მხრიდან “, - აცხადებს საკრებულოს თავმჯდომარე, გიორგი ტყემალაძე.

ნინო ექვთიმიშვილი