პოლიტიკა

კალაძე თბილისელებს უყურებს, როგორც „ინტერის“ ფეხბურთელებს - ლევან ხაბეიშვილმა საკრებულოს სხდომაზე კახა კალაძისთვის „ინტერის“ ფორმა მიიტანა

თბილისის საკრებულოს ფრაქცია „ნაციონალური მოძრაობის“ წევრმა ლევან ხაბეიშვილმა საკრებულოს სხდომაზე დედაქალაქის მერისთვის კახა კალაძისთვის მილანის „ინტერის“ ფორმა მიიტანა.

ხაბეიშვილის განმარტებით, კახა კალაძე, რომელიც ადრე იტალიურ კლუბ „მილანში“ თამაშობდა, თბილისელებს უყურებს, როგორც მილანის „ინტერს“.

„თბილისური და ქალაქური არ ესმის მერს, არაფრის გათვალისწინება არ უნდა. ის სულ ხალხის წინააღმდეგ არის. დედაქალაქის მერს მის ენაზე მინდა დაველაპარაკო – ეს არის მილანის „ინტერის“ ფორმა, „მილანი“ და მილანის „ინტერი“ არიან დაპირისპირებული. კალაძე თბილისელებს უყურებს, როგორც „ინტერის“ ფეხბურთელებს, როგორც მოწინააღმდეგეებს. ეს ფორმა გადაეცით კალაძეს. თბილისელები „ინტერის“ ფეხბურთელები არ არიან“, – განაცხადა ხაბეიშვილმა.

ხაბეიშვილის განცხადებას სიტყვიერი დაპირისპირება მოჰყვა მასსა და საკრებულოს უმრავლესობის წევრ გიორგი მუსხელიშვილს შორის. ამასთან, ხაბეიშვილს უპასუხა უმრავლესობის წევრმა ირაკლი ზარქუამ.

„უნიჭოდ გამოგივიდა, ლევან. ფეხბურთს მაინც ვითამაშებ და ქართველი ხალხის სახელით გავიმარჯვებ კიდეც და გოლსაც გავიტან. ამიტომ გამოგართვი ეს ფორმა, რადგან ამ უნიჭო სპექტაკლებისთვის არ უნდა გამოიყენო ეს ტრიბუნა“, – მიმართა ზარქუამ ხაბეიშვილს.