პოლიტიკა

კახა კუკავა და დიმიტრი ლორთქიფანიძე მედიკამენტებზე მაღალ ფასებს აპროტესტებენ

საქართველოს აფთიაქებში მედიკამენტებზე ფასები რამდენჯერმე აჭარბებს მეზობელ ქვეყნებში მოქმედ ფასებს. სააფთიაქო მონოპოლიების წინააღმდეგ ბრძოლა საარჩევნო ბლოკის „დემოკრატიული მოძრაობა - თავისუფალი საქართველოს“ ერთ-ერთი უმთავრესი პრიორიტეტია.

ბლოკის ლიდერებმა - თბილისის მერობის კანდიდატმა, კახა კუკავამ და საკრებულოს თავმჯდომარეობის კანდიდატმა, დიმიტრი ლორთქიფანიძემ - აღნიშნულ საკითხზე დაამზადეს სარეკლამო რგოლი, სადაც საუბარია საქართველოში ყველაზე უფრო ხშირად მოხმარებადი პრეპარატის - „კაპტოპრილის“ფასზე, რომელსაც ქართველი მონოპოლისტი ოლიგარქები 4.5 ლარად ყიდიან, ხოლო მეზობელ ქვეყნებში მისი ფასი 0.5 ლარია.

მიუხედავად მაუწყებლებზე კანონით დაკისრებული ვალდებულებისა, „საზოგადოებრივმა მაუწყებელმა“ და „აჭარის ტელევიზიამ“ კახა კუკავას და დიმიტრი ლორთქიფანიძის კლიპი აკრძალეს.

ის რომ აღნიშნული გადაწყვეტილება პოლიტიკურადაა მოტივირებული, ცხადად ჩანს მაუწყებლების მიერ ბლოკისთვის გამოგზავნილი აბსურდული დასაბუთებიდან, თითქოს კლიპი კომერციული ხასიათისაა და მისი მიზანია მასში გამოყენებული პროდუქტის რეალიზაციის ხელშეწყობა.

საარჩევნო ბლოკმა საჩივრით მიმართა კომუნიკაციების ეროვნულ კომისიას. კომისიამ დაადასტურა „საზოგადოებრივი მაუწყებლის“ და „აჭარის ტელევიზიის“ მხრიდან კანონის დარღვევა და მათ მიმართ შეადგინა ადმინისტრაციული სამართალდარღვევის ოქმი 1500-1500 ლარით დაჯარიმების შესახებ.