პოლიტიკა

კახა კალაძე საკუთარ თავს კვლავ მთავრობაში ხედავს

კახა კალაძე, რომელიც ,,ქართული ოცნების’’ პროპორციული სიით პარლამენტში მოხვდა, საკუთარ თავს კვლავაც მინისტრთა კაბინეტში ხედავს.

როგორც კალაძე ამბობს, თანამდებობების განაწილება პარტიის პოლიტსაბჭოს სხდომაზე მოხდება.

ვიცე-პრემიერი მედიაში გავრცელებულ იმ ინფორმაციასაც გამოეხმაურა, რომლის თანახმადაც, პარლამენტის თავმჯდომარის თანამდებობაზე ირაკლი კობახიძის კანდიდატურა განიხილება.

,,კონსულტაციები დაწყებულია. ეს მართლაც ასეა. რამდენიმე დღეში შეიკრიბება პარტიის პოლიტსაბჭო, სადაც კონკრეტულად, დეტალურად იქნება განხილული, თუ ვინ რა მიმართულებით გააგრძელებს მომავალი 4 წლის განმავლობაში მუშაობას.

ირაკლი კობახიძის კანდიდატურას რაც შეეხება, მე მის კანდიდატურას მივესალმები პარლამენტის თავმჯდომარეობაზე. რა თქმა უნდა, პარლამენტის თავმჯდომარეები არ იბადებიან. ჩვენ უნდა მივცეთ შესაძლებლობა ადამიანებს. როდესაც მეც ვინიშნებოდი ენერგეტიკის მინისტრად, ძალიან ბევრი საუბარი იყო იმასთან დაკავშირებით, რომ სად კახა კალაძე და სად ენერგეტიკაო, თუმცა მეც და ჩვენმა გუნდმაც დავამტკიცეთ რეალურად ჩვენი გაკეთებული საქმეებით, თუ რა შეგვიძლია და რისი გაკეთება შეგვეძლო.

ზოგადად, მთავრობის ჩამოყალიბებაზე, თუ ვინ რომელ სამინისტროს ჩაიბარებს, რა თქმა უნდა, ამაზეც კონსულტაციები იქნება ამ დღეებში. კონკრეტულად, მე რაც მე შემეხება, ჩემს თავს ალბათ უფრო ვხედავ მთავრობის მიმართულებით’’, - განაცხადა კახა კალაძემ რუსთავი 2-ის ეთერში.

ნინო ექვთიმიშვილი