სამართალი

კახა კალაძე პირადად მადლობას მიხდის მისი ძმის საქმის გამოძიებაში შეტანილი წვლილისთვის - გურამ დონაძე

„თბილისის მერი კახა კალაძე პირადად მადლობას მიხდის მისი ძმის საქმის გამოძიებაში შეტანილი წვლილისთვის“, - ამის შესახებ ბუტა რობაქიძის მკვლელობასთან დაკავშირებით, სამსახურეობრივი უფლებამოსილების ბოროტად გამოყენების საქმეზე ბრალდებულმა, შინაგან საქმეთა სამინისტროს საზოგადოებასთან ურთიერთობის სამსახურის ყოფილმა უფროსმა, გურამ დონაძემ სასამართლო პროცესზე განაცხადა.

როგორც დონაძემ თავის დასკვნით სიტყვაში განაცხადა, საპატრულო პოლიციის იმიჯზე ზრუნვა ნამდვილად შედიოდა მის უფლებამოსილებაში, თუმცა ეს იმას არ ნიშნავდა, რომ პოლიციელთა მხრიდან რამე კანონსაწინააღმდეგო ქმედება დაემალა.

დონაძის მტკიცებით, აღნიშნული საქმის გამოძიება ემსახურება მის განეიტრალებას.

„ბატონო მოსამართლე, ამ საქმეზე მოწმეთა ჩვენებები მრავალჯერ გატეხილი ფიცისა და ჩვენებების შეცვლითაა მიღებული. ეს ადამიანები მინიმუმ ერთხელ სასამართლოს ატყუებენ. გასაზიარებელია ამ ადამიანების ჩვენებები ჩემ წინააღმდეგ? ამ საქმის მთავარი გამომძიებელი შალვა ნიქაბაძე დაისაჯა? - დღეს ის მაღალ თანამდებობაზეა.

ამ საქმის გამოძიება იმის ნათელი მაგალითია, რომ პროკურატურას სიმართლე არ აინტერესებს. ამ საქმის ხელახალი გამოძიების მიზეზი პოლიტიკური მოტივი და ჩემი განეიტრალებაა, როგორც ოპოზიციურად აქტიური ჟურნალისტის", - განაცხადა დონაძემ.

ცნობისთვის, ბუტა რობაქიძის მკვლელობასთან დაკავშირებით, შინაგან საქმეთა სამინისტროს ყოფილი მაღალჩინოსნების მხრიდან სამსახურეობრივი უფლებამოსილების ბოროტად გამოყენების საქმეზე ბრალდებულია 5 პირი: გურამ დონაძე, ზაზა ბაქრაძე, ზურა მიქაძე, ირაკლი ფირცხალავა და დავით იაშვილი.

ერთ-ერთი ბრალდებული, კრიმინალური პოლიციის ყოფილი უფროსი, ზაზა ბაქრაძე, რომელიც თბილისის საერთაშორისო აეროპორტში 28 თებერვალს დააკავეს, ერთ თვეში, 5 000 ლარიანი გირაოს სანაცვლოდ სხდომათა დარბაზიდან გაათავისუფლეს.