პოლიტიკა

ჟენევის მოლაპარაკებებზე მთავარი საკითხი იქნება არჩილ ტატუნაშვილის საკითხი - დავით დონდუა

ჟენევის მოლაპარაკებების 43-ე რაუნდზე ქართული მხარე დააყენებს არჩილ ტატუნაშვილის მკვლელობის საკითხს. ამის შესახებ საგარეო საქმეთა მინისტრის მოადგილემ და ქართული დელეგაციის ხელმძღვანელმა, დავით დონდუამ განაცხადა.

ქართული მხარე მოითხოვს გამოძიების ჩატარებასა და დამნაშავეების დასჯას.

„დღესაც და ხვალაც, მთავარი საკითხი იქნება ორივე სამუშაო ჯგუფის დღის წესრიგში, არჩილ ტატუნაშვილის საკითხი. ჩვენ ძალიან მწვავედ დავაყენებთ ამ საკითხს, განსაკუთრებით რუსეთის დელეგაციის წინაშე, რომ ყველაფერი გაკეთდეს ახლა მაინც, რათა ხელი არ შეეშალოს გამოძიების პროცესს, დადგინდნენ ის პირები, ვინც არიან დამნაშავეები. თუმცაღა პიროვნებების დადგენა, არ ნიშნავს იმას, რომ რუსეთმა პოლიტიკური პასუხისმგებლობა არ უნდა აიღოს იმაზე, რაც მოხდა. უნდა გაკეთდეს ყველაფერი იმისთვის, რომ გამოძიების პროცესი წარმატებით დასრულდეს. ეს იქნება მთავარი თემა, რომელსაც ჩვენ დავაყენებთ დღეს თანათავმჯდომარეებთან და თანამოდერატორებთან. ასევე ხვალ ორივე სამუშაო ჯგუფში - როგორც უსაფრთხოების, ასევე ჰუმანიტარულ სამუშაო ჯგუფებში ამაზე იქნება საუბარი. ეს არის გამოწვევა უსაფრთხოების მხრივ. ეს არის ის განუკითხაობა, რაც ხდება ოკუპირებულ ტერიტორიებზე ადამიანის უფლებების და ჰუმანიტარული თვალსაზრისით და ეს სამწუხაროდ, პირველი შემთხვევა არ არის. ორი წლის წინ იყო ოთხოზორიას მკვლელობის ფაქტი, მანამდე - ბაშარულის მკვლელობის ფაქტი. თუ დამნაშავეები არ დაისაჯნენ, ვიღაცამ არ აიღო პასუხისმგებლობა და გასაგებია ვინც - ეს არის ის ძალა, რომელიც ახორციელებს ეფექტურ კონტორლს ოკუპირებულ ტერიტორიებზე, ეს მომავალშიც გაგრძელდება“, - განაცხადა დონდუამ.

არჩილ ტატუნაშვილი საოკუპაციო ძალებმა 22 თებერვალს გაიტაცეს ახალგორის რაიონიდან. მომდევნო დღეს ოსურმა მედიამ გაავრცელა ინფორმაცია ტატუნაშვილის დაღუპვის შესახებ. ქართული მხარის მოთხოვნის მიუხედავად ცხედრის გადმოცემა მხოლოდ 20 მარტს მოხდა. ქართული მხარის ინფორმაციით, ტატუნაშვილი ნაწამებია.