პოლიტიკა

ივანიშვილმა კალაძეს უსაყვედურა, „ქართული ოცნების“ შეხვედრას კი კოკა გუნცაძე და გოგა ხაინდრავა ესწრებოდნენ - პირველი რადიო

ბიძინა ივანიშვილისა და საპარლამენტო უმრავლესობის დღევანდელ შეხვედრას დეპუტატებისა და პარტიული ლიდერების გარდა, საქართველოს რკინიგზის სამეთვალყურეო საბჭოს თავმჯდომარე კოკა გუნცაძე და რეჟისორი გოგა ხაინდრავაც ესწრებოდნენ. ამის შესახებ „პირველი რადიო“ იუწყება.

მისივე ცნობით, შეხვედრაზე თბილისის ხუთი საარჩევნო ოლქის წაგების გამო თბილისის მერმა კახი კალაძემ ივანიშვილისგან მკაცრი საყვედური მიიღო. საყვედურის ადრესატები გახდნენ ის მაჟორიტარებიც, რომელთა რაიონებშიც სალომე ზურაბიშვილმა დაბალი შედეგი აჩვენა. საყვედური მიიღო „ფსიქოპროექტის“ ხელმძღვანელმა ზურაბ ბიგვავამ და პარტიის პიარჯგუფმა - კვლევებისა და არასწორი პიარსტრატეგის გამო.

საუბარი ასევე შეეხებოდა მოსალოდნელ ცვლილებებს მთავრობაში. „პირველი რადიოს“ ინფორმაციით, უახლოეს მომავალში მთავრობაში სამთავრობო ცვლილებები განხორციელდება და შესაძლოა, პოსტები ეკონომიკური და ძალოვანი გუნდის მინისტრებმა დატოვონ. ამავე შეხვედრაზე ასევე გავრცელბული ინფორმაციით, გადაწყდა, რომ ზურაბიშვლის შტაბის კოორდინირება კოკა გუნცაძეს ჩაბარდა.