სამართალი

იუსტიციის მინისტრი „OGP“-ის გლობალურ სამიტში მონაწილეობს

იუსტიციის სამინისტროს დელეგაცია თეა წულუკიანის ხელმძღვანელობით პარიზში „ღია მმართველობის პარტნიორობის“ რიგით მეოთხე გლობალური სამიტის მუშაობაში მიიღებს მონაწილეობას. ღონისძიებას სხვადასხვა ქვეყნის სამთავრობო, სამოქალაქო საზოგადოებისა და ბიზნესსექტორის წარმომადგენლები დაესწრებიან, - აცნობეს მედიანიუსს იუსტიციის სამინისტროდან.

სამიტი 2016 წლის 7 დეკემბერს გაიხსნება. დამსწრე საზოგადოებას სიტყვით მიმართავს საფრანგეთის რესპუბლიკის პრეზიდენტი ფრანსუა ოლანდი. პეზიდენტი გახსნით ცერემონიას პარტნიორობის სამოქალაქო საზოგადოების წარმომადგენელ თანათავმჯდომარესთან, მსოფლიო რესურსების ინსტიტუტის აღმასრულებელ დირექტორ მანიშ ბაპნასთან ერთად წარუძღვება. გახსნით ცერემონიაზე სიტყვით წარდგება საქართველოს პრეზიდენტი გიორგი მარგველაშვილი.

როგორც სამინისტროში აღნიშნავენ, წლევანდელი სამიტის მთავარი მოვლენაა ღია მმართველობის პარიზის დეკლარაციის ხელმოსაწერად გახსნა. დეკლარაცია შედგება კოლექტიური ვალდებულებებისგან ღია მმართველობის სხვადასხვა თემატიკაზე. მთავრობებს/არასამთავრობო ორგანიზაციებს შეუძლიათ შეუერთდნენ ერთ ან რამდენიმე ვალდებულებას, რომელთა შესრულება ღია მმართველობის რეფორმების წარმატებით განხორციელებას შეუწყობს ხელს. სამიტზე საქართველო დეკლარაციის ხუთ კოლექტიურ ვალდებულებას შეუერთდება, ესენია: კორუფციის წინააღმდეგ ბრძოლა, სამართალშემოქმედების პროცესში მოქალაქეთა მონაწილეობა, სამოქალაქო საზოგადოებასთან თანამშრომლობის მექანიზმების გაუმჯობესება, ინოვაციური ტექნოლოგიების გამოყენება მთავრობის ღიაობის მისაღწევად და, აგრეთვე, ვალდებულება, რომელიც კლიმატთან დაკავშირებული სტრატეგიებისა და სამოქმედო გეგმების შემუშავებას ითვალისწინებს.