სამართალი

იუსტიციის მინისტრი მედიაციის ინსტიტუტის გაძლიერებას გეგმავს

მედიაციის შესახებ კანონპროექტს იუსტიციის მინისტრი თეა წულუკიანი რამდენიმე დღეში წარადგენს. მისი განცხადებით, დოკუმენტი უკვე მზადაა და მას ჯერ მთავრობა, შემდეგ კი საკანონმდებლო ორგანო განიხილავს.

მინისტრი სასამართლო მედიაციის კიდევ უფრო გაძლიერდებას გეგმავს. ის ამბობს, რომ მედიაციის ინსტიტუტი ზოგადად, სასამართლოს მიღმაც, გაძლიერდება, რისთვისაც მედიატორთა ასოციაციაც შეიქმნება.

„მედიაცია, რა თქმა უნდა, იქნება ნებაყოფლობითი, მაგრამ თუკი მხარეები მედიატორის წინაშე შეთანხმდებიან, სასამართლოს ექნება ნაკლები საქმე, მხარეები კი დავის გადაჭრას მოახერხებენ უფრო სწრაფად. სამოქალაქო პალატები გადატვირთულია და შედარებით მარტივ დავებზე მხარეებს თვეობით ლოდინი უწევთ”, – განაცხადა წულუკიანმა.

იუსტიციის მინისტრმა ახალი კანონპროექტი ბიზნესმენებსაც წარუდგინა და აღნიშნა, რომ მედიაცია კომერციული დავებისთვისაც იქნება ხელმისაწვდომი.

ცირა გურგენიძე