საზოგადოება

იციკ მოშე: კულტურის ექსპორტი საქართველოს მიმართ ინტერესს კიდევ უფრო გაზრდის

თბილისში ებრაული კულტურისა და მემკვიდრეობის დაცვისა და ხელშეწყობის ევროპული ასოციაციის AEPJ-ის ახალი პროექტის - Parallel Traces გამოფენა გაიხსნა, რომელიც ევროკავშირთან თანამშრომლობით, Creative Europe - პროგრამის ფარგლებში შეიქმნა.

გამოფენის ორგანიზატორია „ისრაელის სახლი“, რომელიც საქართველოში ევროსაბჭოს მიერ სერტიფიცირებული ებრაული კულტურული მემკვიდრეობის მარშრუტის ოფიციალური წარმდგენია. ორგანიზაცია აქტიურად თანამშრომლობს საქართველოს განათლების, მეცნიერების, კულტურისა და სპორტის სამინისტროსა და AEPJ-სთან, რომელთა ეგიდითაც ხორციელდება აღნიშნული მარშრუტი.

სპეციალურად ამ ღონისძიებისთვის თბილისს ეწვივნენ ებრაული კულტურისა და მემკვიდრეობის დაცვისა და ხელშეწყობის ევროპული ასოციაციის AEPJ-ის დირექტორი ვიქტორ სორენსენი და სტუმრები ევროპის ექვსი ქვეყნიდან. ღონისძიებას დაესწრნენ, აგრეთვე, საქართველოს პარლამენტის წევრები, განათლების, მეცნიერების, კულტურისა და სპორტის სამინისტროს წარმომადგენლები.

გამოფენის გახსნას ვიდეომიმართვით მიესალმა საქართველოში ევროსაბჭოს ოფისის ხელმძღვანელი ნატალია ვუტოვა. ღონისძიების მონაწილეებს პირდაპირი ჩართვით ისრაელიდან მიმართა ქნესეთის წევრმა, იმიგრაციის, აბსორბციისა და დიასპორის საქმეთა კომიტეტის თავმჯდომარემ დავიდ ბიტამა.

გამოფენა „ისრაელის სახლის“ ხელმძღვანელმა იციკ მოშემ გახსნა. მისი თქმით, „ისრაელის სახლისთვის“ ებრაული მემკვიდრეობა არ არის წარსულში დაბრუნება. ეს არის კულტურული კოდი, რომლითაც ვაშენებთ მომავალს.

„ჩვენ ბედნიერები ვართ, რომ ვმონაწილეობთ მაღალი დონის კულტურის ექსპორტში საქართველოდან, რასაც ჰქვია კულტურული დიპლომატია. ჩვენ 1 წლის წინ საქართველოს ეროვნულ მუზეუმს გადავეცით ახალი სამუზეუმო ფართი 3500 კვ.მ; ჩვენ გავხსენით ქალაქ ონში ჰოლოკოსტის მონუმენტი, რომელიც არის პირველი კავკასიასა და ცენტრალურ აზიაში.

გვჯერა, რომ კულტურული მემკვიდრეობა მნიშვნელოვანია და იზიდავს ტურიზმს.

ტურიზმის შემოსავლის ნაწილი შეიძლება ჩაიდოს კულტურის დიპლომატიაში და კულტურის ექსპორტში, რაც გაზრდის საქართველოს მიმართ ინტერესს, მოიტანს დამატებით ინვესტიციებს. და ეს ყველაფერი გაზრდის საქართველოს ეკონომიკასაც“, - აღნიშნა იციკ მოშემ და დასძინა: „კულტურა არის ნაციონალური კონსენსუსი. კულტურა იყო უფრო ადრე, ვიდრე დიპლომატია ქვეყნების ურთიერთობებში.

ჩვენ გვაქვს მესამე სექტორში საქმიანობის 30-წლიანი გამოცდილება. მსოფლიო ებრაელობაში საკითხების 90% კეთდება სწორედ მესამე სექტორის მიერ
ჩვენ არ გვაქვს არც ფუფუნება და არც უფლება მოდუნების. სანამ ჩინოვნიკები არკვევენ შუქის ნიშნები რამდენად წარმოადგენს მზეს, ჩვენ, მესამე სექტორს გვევალება დავაჩქაროთ მზე და თუ ეს არაა მზე - ამოვიყვანოთ ის, რომელიც გაანათებს მომავალს”.

საქართველოში ევროკავშირის წარმომადგენლობის თანამშრომლობის მიმართულების ხელმძღვანელის სიგრიდ ბრეტელის შეფასებით, ეს გამოფენა არის ევროპული მემკვიდრეობის ერთ-ერთი ნათელი მხარე. რადგან საქართველოს აქვს ღრმა და დიდი ებრაული მემკვიდრეობა. ქვეყანაში მოღვაწეობს ბევრი ნიჭიერი ხელოვანი. ეს კარგია ევროპული კომუნიკაციისთვისაც, რადგან ამ გამოფენაში ვნახე ბევრი არტისტის ნამუშევარი“, - აღნიშნა ბრეტელმა.

პარლამენტის განათლების, მეცნიერებისა და კულტურის კომიტეტის წევრის, ელისო ბოლქვაძის თქმით, სიმბოლურია რომ ამ გამოფენას მასპინძლობს საქართველო, ქვეყანა, რომელიც არის მდიდარი კულტურითა და კულტურული მემკვიდრეობით და ასევე აქ შემორჩენილია დიდი ებრაული კულტურული მემკვიდრეობა.

„ევროსაბჭოს ეგიდით საქართველოში მოქმედებს ებრაული კულტურული მემკვიდრეობის მარშრუტი. ეს არის ერთი მხრივ ზრუნვა კულტურულ ღირებულებებზე, მეორე მხრივ, ამ მარშრუტის წყალობით საქართველო დიდი ხანია ისრაელისა და მსოფლიო ებრაელობისგან ტურისტთა ყურადღების ცენტრშია. ებრაული კულტურული მემკვიდრეობის მარშრუტის ამოქმედება კიდევ უფრო აღრმავებს ისრაელთან და მსოფლიო ებრაელობასთან საქართველოს კავშირებს, რაც ძალიან მნიშვნელოვანია.

მივესალმები ამ ფორმატში ისრაელის სახლის მიერ ყოველწლიურად ებრაული კულტურის ევროპული დღეების ჩატარებას.

იუნესკოს მშვიდობის არტისტის რანგში მე პირადად ვმონაწილეობდი ისრაელის სახლის მიერ ქნესეთის წევრებთან ერთად ორგანიზებულ ღონისძიებებში საქართველოსა და ისრაელში. მიმაჩნია, რომ ასეთი აქტივობები ხელს უწყობს საქართველოს მრავალმხრივ წარმოჩენას, გარე სამყაროსთან მჭიდრო კავშირების ჩამოყალიბებას და რაც მთავარია, სამართლიანად იმის ხაზგასმას, რითიც საქართველო ყოველთვის ამაყობს - ესაა მაღალი კულტურა და ტოლერანტული განწყობა“, - განაცხადა პარლამენტარმა.

გამოფენა Parallel Traces-ის პროექტის ავტორები მიიჩნევენ, რომ ევროპის ისტორიის განუყოფელი ნაწილის - ევროპული ებრაული მემკვიდრეობის შესახებ ცნობიერების ამაღლება სხვადასხვა მექანიზმის საშუალებით შეიძლება. კერძოდ, ლაპარაკია ფოტოგრაფიული და აუდიოვიზუალური ნამუშევრების შექმნასა და ახალი აპლიკაციის განვითარებაზე. ებრაული მემკვიდრეობის ამსახველი ორიგინალური ციფრული ნამუშევრები, აგრეთვე, მნიშვნელოვანი მხატვრული მასალებია, რომლებიც წარმოდგენილია გამოფენებზე.

ეს არის ტრანსნაციონალური კულტურული და შემოქმედებითი სამუშაოების შედეგი.

პროექტის მონაწილე ქვეყნებია: ბელგია, ლუქსემბურგი, ესპანეთი, სერბია, რუმინეთი, პოლონეთი და საქართველო.

გამოფენა თანამედროვე ხელოვნების მუზეუმში (რუსთაველის გამზირი #27) 11 აპრილამდე გაგრძელდება.

გამოფენის გახსნამდე, „ისრაელის სახლის“ ხელმძღვანელმა იციკ მოშემ და ებრაული კულტურისა და მემკვიდრეობის დაცვისა და ხელშეწყობის ევროპული ასოციაციის AEPJ-ის დირექტორმა ვიქტორ სორენსონმა შეხვედრა გამართეს პარლამენტში. სტუმრეს უმასპინძლა პარლამენტის თავმჯდომარის პირველმა მოადგილემ გიორგი ვოლსკიმ. შეხვედრას ესწრებოდნენ პარლამენტარები ელისო ბოლქვაძე და ირაკლი მეზურნიშვილი.

როგორც შეხვედრაზე ითქვა, ებრაული კულტურისა და მემკვიდრეობის დაცვისა და ხელშეწყობის ევროპული ასოციაციასთან (AEPJ) თანამშრომლობა საქართველოს იმიჯისთვის უმნიშვნელოვანესია. იმის გამო, რომ აღნიშნული ასოციაცია და მისი ეგიდით „ისრაელის სახლი“ კულტურულ მემკვიდრეობის დაცვა/პოპულარიზაციაზე მუშაობენ, ეს საქართველოსთვის ერთ-ერთი ქმედითი ინსტრუმენტია მსოფლიოდან ტურისტების მოსაზიდად, რაც სერიოზული შენატანია ქვეყნის ეკონომიკაში. პარლამენტარების თქმით, მათი სურვილია, პარლამენტის ეგიდით შემუშავდეს კულტურათაშორისი ურთიერთობის პროექტი, რომელიც AEPJ-სთან და „ისრაელის სახლთან“ თანამშრომლობით განხორციელდება.