პოლიტიკა

ის მიდის ბიძინა ივანიშვილთან უთანხმოების გამო - დავით ბაქრაძე

„ევროპული საქართველოს“ ერთ-ერთი ლიდერი დავით ბაქრაძე გამოეხმაურა პრემიერ-მინისტრ გიორგი კვირიკაშვილის გადადგომას. პრესკონფერენციისას ბაქრაძემ აღნიშნა, რომ გიორგი კვირიკაშვილის მიერ გამართული ბრიფინგიდან ნათლად ჩანდა, რომ ის პრემიერის პოსტიდან ბიძინა ივანიშვილთან უთანხმოების გამო მიდის.

დეპუტატის განცხადებით, არჩევნების გზით უნდა მოვიდეს ის პოლიტიკური გუნდი, რომელიც მოახერხებს საქართველოს განვითარებას, სიღარიბის დამარცხებასა და ქვეყანაში სტაბილურობის უზრუნველყოფას.

„პრემიერ-მინისტრის ბრიფინგიდან ნათლად გამოჩნდა ორი რამ: პირველი - მან ღიად დაასახელა, რომ ის მიდის ბიძინა ივანიშვილთან უთანხმოების გამო, რომელიც არის ამ ქვეყანაში ყველა გადაწყვეტილების მიმღები და მეორე - მან ისაუბრა, ამ ქვეყნის ეკონომიკურ და სხვა ტიპის წარმატებებზე, რაც კიდევ ერთხელ ადასტურებს, რომ გადადგომის მომენტშიც კი მთავრობა არის არაადეკვატური და ვერ ხედავს იმ პრობლემებს, იმ კრიზისებს, იმ სირთულეებს, რომელიც დღეს ქვეყანაში არსებობს. ამიტომ, ამ ყველაფრიდან გამოსავალი არის მთლიანად იმ გუნდის ცვლილება, რომელსაც არ შეუძლია ქყვეყნის წინ წაყვანა, არ შეუძლია ქვეყნის ნორმალურად მართვა და არჩევნების გზით მშვიდობიანად ქვეყნის სათავეში ისეთი გუნდის მოსვლა, რომელიც შეძლებს საქართველოს განვითარებას, სიღარიბის დამარცხებასა და ქვეყანაში სტაბილურობის უზრუნველყოფას“,- განაცხადა ბაქრაძემ.

გუშინ გიორგი კვირიკაშვილმა პრემიერ-მინისტრის პოსტი დატოვა, რაც ავტომატურად ნიშნავს მთელი მთავრობის გადადგომას.