პოლიტიკა

ირმა ინაშვილი საქართველოში ჩინეთის სახალხო რესპუბლიკის საგანგებო და სრულუფლებიან ელჩს შეხვდა

საქართველოს პარლამენტის თავმჯდომარის მოადგილემ, ფრაქცია „საქართველოს პატრიოტების“ წევრმა, ირმა ინაშვილმა ჩინეთის სახალხო რესპუბლიკის საგანგებო და სრულუფლებიან ელჩთან საქართველოში, ძი იანჩისთან გაცნობითი ხასიათის შეხვედრა გამართა.

შეხვედრისას მხარეებმა საქართველოსა და ჩინეთს შორის მნიშვნელოვნად განვითარებული ორმხრივი თანამშრომლობის საკითხები განიხილეს პოლიტიკურ, სავაჭრო-ეკონომიკურ, კულტურის, განათლების და სხვა სფეროებში. მხარეებმა აღნიშნეს, რომ ორ ქვეყანას შორის ურთიერთობები კიდევ მეტად უნდა გაღრმავდეს.

„განსაკუთრებული აქცენტი ეკონომიკური ურთიერთობების თემაზე გაკეთდა. საქართველოში ჩინური კომპანიების არაერთი პროექტი ხორციელდება, მათ შორის, ტელესაკომუნიკაციო და სოფლის მეურნეობის სფეროში. ელჩმა კმაყოფილება გამოხატა იმ ფაქტის გამო, რომ ხელისუფლება გამოთქვამს მზადყოფნას მიიღოს კიდევ მეტი ჩინური ინვესტიცია და ხაზი გაუსვა, რომ ჩინელი ინვესტორები მათზე დაკისრებულ მოვალეობებს კეთილსინდისიერად ასრულებენ“, - განაცხადა ირმა ინაშვილმა.

ირმა ინაშვილმა ყურადღება უცხოური საინვესტიციო პროექტის ფარგლებში ადგილობრივი მოსახლეობის დასაქმების მნიშვნელობასა და აუცილებლობაზე გაამახვილა.

შეხვედრაზე საუბარი ქვეყნის საშინაო პოლიტიკის საკითხებსაც შეეხო.

ელჩი დაინტერესდა სახელმწიფო საკონსტიტუციო კომისიის მუშაობით. მიიღო ინფორმაცია იმ კანონპროექტების შესახებ, რომელთა წარდგენასაც ფრაქცია საგაზაფხულო სესიაზე გეგმავს.

შეხვედრაზე აღინიშნა, რომ შეიქმნება საქართველო-ჩინეთის პარლამენტების მეგობრობის ჯგუფი, რომლის ფარგლებშიც არაერთი იდეა და პროექტი განხორციელდება, რაც ორი ქვეყნის პარლამენტის ურთიერთობას კიდევ მეტად გააღრმავებს.

შეხვედრაზე ირმა ინაშვილმა, ფრაქცია „საქართველოს პატრიოტების“ სახელით, თბილისში, ჩინელი პოლიტიკოსი ქალების მოწვევის სურვილი გამოხატა. „ელჩმა, თავის მხრივ, მზადყოფნა გამოხატა და ამ მიმართულებით დახმარებას და თანადგომას დაგვპირდა, რათა რაც შეიძლება მეტი ჩინელი პოლიტიკოსი ქალი ჩამოვიდეს თბილისში და ჩვენს ქვეყანას და საპარლამენტო საქმიანობას გაეცნოს“, - განაცხადა შეხვედრის დასრულების შემდეგ ირმა ინაშვილმა.