კომენტარი

ირმა ინაშვილი - საპარლამენტო უმცირესობას: თქვენი დაცვა არ სჭირდება ქართულ ჟურნალისტიკას

პარლამენტის ვიცე-სპიკერი, ფრაქცია ,,საქართველოს პატრიოტების’’ წევრი, ირმა ინაშვილი უმცირესობაში შემავალი ფრაქციის ,,ევროპული საქართველოს’’ წევრის, ელენე ხოშტარიას მიერ სხდომათა დარბაზში ბანერის - ,,არა მედიაზე შტურმის’’ გაკვრას გამოეხმაურა.

როგორც ინაშვილმა პარლამენტის პლენარულ სხდომაზე სიტყვით გამოსვლისას აღნიშნა, ნაციონალური მოძრაობა იყო ის ხელისუფლება, რომელმაც 40-ზე მეტი ტელეარხი წაართვა მესაკუთრეებს.

,,მე ვარ ის ადამიანი, რომელსაც ერთ-ერთი ტელევიზია წაართვით. ჩემი ცხოვრების 10 წელი დავხარჯე იმაზე, რომ ეს ტელევიზია დაგვებრუნებინა ჩვენ. თქვენ მიერ, ადეიშვილის და სააკაშვილის მიერ წართმეული ტელევიზია და დღეს გამოფინეთ პლაკატი ,,არა მედიაზე შტურმს.’’ თქვენი დაცვა არ სჭირდება ქართულ ჟურნალისტიკას. ამ დარბაზში არის ხალხი, ვინც ქართულ ჟურნალისტიკას ღირსეულად დაიცავს. ამ ხელისუფლებაზე ბევრი რამ კი არის სათქმელი, მაგრამ, როგორც ჟურნალისტი იმას ვიტყვი, რომ დღეს გაცილებთ თავისუფალი მედიასივრცე, ვიდრე იყო თქვენ დროს და არც შევადარებ. ნიკა გვარამია დაიცავით ამ დარბაზის გარეთ’’, - მიმართა ინაშვილმა საპარლამენტო უმცირესობის წარმომადგენლებს.

,,საქართველოს პატრიოტების’’ წევრმა, მომავალ სხდომაზე ,,ნაციონალური მოძრაობის’’ საწინააღმდეგო შინაარსის ბანერის მოტანაც დაანონსა.

,,მომავალ სხდომაზე მე მოვიტან პლაკატს, პირდაპირ მიგიკრავთ წინ და ამ პლაკატზე ეწერება - ,,გასამართლდნენ ნაციონალური მოძრაობის დამნაშავე ლიდერები’’ და მოთმინებით აიტანეთ ეს. არც ეს იქნება რეგლამენტის დარღვევა’’, - განაცხადა ინაშვილმა.

ნინო ექვთიმიშვილი