პოლიტიკა

ირმა ინაშვილი ისრაელის საგანგებო და სრულუფლებიან ელჩს შეხვდა

საქართველოს პარლამენტის თავმჯდომარის მოადგილე, ფრაქცია „საქართველოს პატრიოტების“ წევრი, ირმა ინაშვილი ისრაელის საგანგებო და სრულუფლებიან ელჩს, შაბთაი ცურის შეხვდა.

გაცნობითი ხასიათის შეხვედრაზე მხარეებმა ორი ქვეყნის ურთიერთობასა და თანამშრომლობის გაძლიერებაზე ისაუბრეს.

ირმა ინაშვილმა ისრაელის ელჩს ფრაქციის საპარლამენტო გეგმები გააცნო და იმ საკანონმდებლო ინიციატივებზე ესაუბრა, რომელთა წარდგენასაც ფრაქცია საგაზაფხულო სესიაზე გეგმავს.

შეხვედრაზე მხარეებმა ყურადღება ორი ქვეყნის ეკონომიკური თანამშრომლობის საკითხებზე გაამახვილეს და საქართველოში მიმდინარე რეფორმები განიხილეს. „ვისაუბრეთ ეკონომიკაზე, რეფორმებზე, რომელიც საქართველოში ხორციელდება და იმ გამოცდილებაზე, რაც ისრაელს აქვს დემოკრატიის მშენებლობის კუთხით“,- აღნიშნა ირმა ინაშვილმა.

შეხვედრაზე გამოითქვა მზადყოფნა, რომ ორი ქვეყნის პარლამენტი ერთმანეთს საკანონმდებლო ინიციატივების ნაწილში გამოცდილებას გაუზიარებს. ასევე აღინიშნა, რომ ისრაელში საქართველოს პარლამენტის წევრების ვიზიტი დაიგეგმება. „ჩვენ ვართ სტრატეგიული პარტნიორები არაერთი მიმართულებით და ეს მეგობრული ურთიერთობა და პარტნიორობა გაგრძელდება. გაღრმავდება ურთიერთობები ჩვენს საკანონმდებლო ორგანოებს შორის. ვგეგმავთ ვიზიტს ისრაელში, სადაც ისრაელის პარლამენტის წარმომადგენლებს შევხვდებით,“-განაცხადა შეხვედრის დასრულების შემდეგ ირმა ინაშვილმა.