პოლიტიკა

ირმა ინაშვილი დიდი ბრიტანეთის საგანგებო და სრულუფლებიან ელჩს შეხვდა

საქართველოს პარლამენტის თავმჯდომარის მოადგილემ, ფრაქცია „პატრიოტების“ წევრმა ირმა ინაშვილმა, დიდი ბრიტანეთის საგანგებო და სრულუფლებიან ელჩთან საქართველოში, ჯასტინ მაკკენზი სმიტთან შეხვედრა გამართა.

ოფიციალური ცნობით, გაცნობითი ხასიათის შეხვედრაზე საუბარი საქართველოსა და დიდი ბრიტანეთის ორმხრივ ურთიერთობას და საპარლამენტო თანამშრომლობის გაღრმავების მნიშვნელობას შეეხო.

დიდი ბრიტანეთის ელჩი ფრაქციის საპარლამენტო გეგმებით და საკანონმდებლო ინიციატივებით დაინტერესდა. ჯასტინ მაკკენზი სმიტმა ირმა ინაშვილისგან პრეზიდენტის არჩევის წესისა და სააჩევნო სისტემის შესახებ ფრაქციის ხედვებზე მიიღო ინფორმაცია.

ირმა ინაშვილმა ელჩს მადლობა გადაუხადა საგანმანათლებლო პროექტებისთვის, რომელსაც ბრიტანეთის საელჩო საქართველოში ქართველი სტუდენტებისა და მოსწავლეებისთვის აქტიურად ახორციელებს.

მხარეები მომავალში აქტიური თანამშრომლობის გაგრძელებასა და გაღრმავებაზე შეთანხმდნენ.

„ვისაუბრეთ საინვესტიციო პროექტებზე. მოეწყობა აქტიური დისკუსიები საარჩევნო თემატიკაზე და დემოკრატიული რეფორმების საკითხებზე. შევთანხმდით, რომ დიდ ბრიტანეთში ჩვენი ვიზიტი დაიგეგმება,“- განაცხადა შეხვედრის დასრულების შემდეგ ირმა ინაშვილმა.