პოლიტიკა

ირინა ენუქიძის მსგავსად, ზაზა სარალიძე იცავს ჩვენი შვილების სიცოცხლეს - პრეზიდენტი

საქართველოს პრეზიდენტმა გიორგი მარგველაშვილმა დღევანდელ ბრიფინგზე ხორავას ქუჩის საქმეზე ისაუბრა. ქვეყნის პირველმა პირმა ხორავას ქუჩაზე მოკლული დავით სარალიძის მამას, ზაზა სარალიძეს მხარდაჭერა გამოუცხადა და შეადარა პოლიციელების მიერ მოკლული სანდრო გირგვლიანის დედას ირინა ენუქიძეს.

პრეზიდენტის თქმით, ამ საკითხზე გამართული პოლიტიკური დებატებისა და შეფასებების გამო საზოგადოებას აქვს განცდა, რომ სახელმწიფო ინსტიტუტების შესუსტება მისულია იმ დონემდე, რომ საფრთხე ექმნება ადამიანის უფლებების სახელმწიფოს მიერ ეფექტურ დაცვას.

„მინდა, გამოვეხმაურო ხორავას ქუჩაზე განვითარებული მოვლენების შესახებ მიმდინარე აქტიურ პოლიტიკურ დისკუსიას.

კიდევ ერთხელ მინდა გამოვუცხადო ჩემი თანადგომა და მხარდაჭერა ზაზა სარალიძეს. ირინა ენუქიძის მსგავსად, ის იცავს ჩვენი შვილების სიცოცხლეს.

ტრაგიკულია, რომ 10 წლისთავზე იმ ტრაგედიიდან, რომელმაც ქართული საზოგადოება შეძრა, დღეს დედაქალაქის მთავარ გამზირზე იმავე მოთხოვნით, იმავე ტრაგედიის საზოგადოებისთვის გაზიარებით დგას შვილმკვდარი მშობელი.

ამ ვითარებაზე გამართული პოლიტიკური დებატები და შეფასებები კიდევ უფრო გაუგებარ განცდას ტოვებს საზოგადოებაში.

არ ვაკეთებ კომენტარს ფარულ ჩანაწერებზე. მე კომენტარს ვაკეთებ პოლიტიკურ შეფასებებზე, რომელიც ამას მოჰყვება. საზოგადოებაში ჩნდება განცდა, რომ სახელმწიფო ინსტიტუტების შესუსტება მისულია იმ დონემდე, რომ საფრთხე ექმნება ადამიანის უფლებების, თავისუფლების და საკუთრების სახელმწიფოს მიერ ეფექტურ დაცვას“, -თქვა პრეზიდენტმა.