მსოფლიო

ირანსა და ისრაელს შორის შეტაკება მოხდა

ირანის რევოლუციონერთა გუშაგებმა სირიის სამხრეთიდან ისრაელის სამხედრო ბაზების მიმართულებით 20 რაკეტა გაუშვეს. შემთხვევა ხუთშაბათს შუაღამით მოხდა. ამის შესახებ ისრაელმა განაცხადა.

სარაკეტო თავდასხმათა ნაწილი იყო შეჩერებული ანტისარაკეტო თავდაცვითი სისტემით „რკინის გუმბათი“. არ გავრცელებულა ინფორმაცია, მოჰყვა თუ არა ამას მსვერპლი. არსებული ცნობებით, ისრაელის სამხედრო ბაზებს „შეზღუდული“ ზარალი მიადგათ.

ირანის იერიშზე ისრაელმა საპასუხო დარტყმა განახორციელა სირიაში განლაგებულ ირანის სავარაუდო სამხედრო ბაზებზე. ისრაელის სამხედრო პრესსპიკერმა გააფრთხილა სირიის მმართველი ბაშარ ალ-ასადი, არ ჩარეულიყო ისრაელი-ირანის შეჯახებაში.

არაბული მედიის თანახმად, ისრაელის თავდაცვის ძალებმა იერიში მიიტანეს უამრავ სამიზნეზე, მათ შორის საჰაერო თავდაცვის სისტემებსა და იარაღის საწყობზე.

სირიელი მეამბოხეების თქმით, იერიში მიიტანეს სამ ავიაბაზაზე. გავრცელებული ცნობით, ისრაელის თავდასხმა იყო დაფიქსირებული სირიის ჩრდილოეთ-დასავლეთში მდებარე ქალაქ ქუსაირის სიახლოვეს, ლიბანის საზრვართან, რომელიც ცნობილია, როგორც ჰეზბოლას სიმაგრე.

ორშაბათს ისრაელის ენერგეტიკის მინისტრმა იუვალ შტაინიცმა მოკვლით დაემუქრა სირიის პრეზიდენტ ბაშარ ან-ასადს, თუკი ირანი ისრაელს სირიიდან დაარტყამს.

თეირანმა პირობა დადო, რომ შურს იძიებს ისრაელზე მას შემდეგ, რაც გავრცელდა ინფორმაცია, რომ 9 აპრილს ისრაელის საჰაერო ძალებმა სირიაში არსებული სამხედრო ბაზა დაბომბეს, რომლის შედეგად ირანის გუშაგთა კორპუსის სულ მცირე 7 წევრი დაიღუპა. ოფიციალურმა იერუსალიმმა ამ საკითხზე კომენტარის მიცემაზე უარი თქვა.