მსოფლიო

ისრაელი ბაშარ ალ-ასადს მოკვლით ემუქრება

ისრაელის ენერგეტიკის მინისტრმა იუვალ შტაინიცმა განაცხადა, რომ თუ ირანი სირიიდან დაარტყამს ისრაელს, ისრაელი მოკლავს ბაშარ ალ-ასადს.

ასე გამოეხმაურა მინისტრი ინფორმაციას, რომ თეირანი ისრაელის წინააღმდეგ შეტევას გეგმავს.

„თუ ასადი ირანელებს თავისი ტერიტორიიდან მოქმედების საშუალებას მისცემს, მან უნდა იცოდეს, რომ სასიკვდილო განაჩენს აწერს ხელს და ეს მისი დასასრული იქნება. ჩვენ დავამხობთ მის რეჟიმს“, -განაცხადა შტაინიცმა.

მან დაამატა, რომ „ასადს არ შეუძლია წყნარად ჯდომა თავის სასახლეში და საკუთარი რეჟიმის აღდგენა სანან ის დაუშვებს, რომ სირია გადაიქცეს ბაზად ისრაელის სახელმწიფოზე იერიშის განსახორციელებლად“.

თეირანმა პირობა დადო, რომ შურს იძიებს ისრაელზე მას შემდეგ, რაც გავრცელდა ინფორმაცია, რომ 9 აპრილს ისრაელის საჰაერო ძალებმა სირიაში არსებული სამხედრო ბაზა დაბომბეს, რომლის შედეგად ირანის გუშაგთა კორპუსის სულ მცირე 7 წევრი დაიღუპა. ოფიციალურმა იერუსალიმმა ამ საკითხზე კომენტარის მიცემაზე უარი თქვა.