პოლიტიკა

ირანის საგარეო უწყებამ უკმაყოფილება გამოთქვა თბილისის აეროპორტში ისლამურ თავსაბურავის „უპატივცემულო მოპყრობასთან“ დაკავშირებით

ირანის საგარეო უწყების პრესმდივანმა ბაჰრამ ქასემიმ უკმაყოფილება გამოთქვა იმასთან დაკავშირებით, რომ ირანის ზოგიერთი მოქალაქე პრობლემებს აწყდება თბილისის საერთაშორისო აეროპორტში. მან კომენტარი გააკეთა თბილისის აეროპორტის უსაფრთხოების სამსახურის თანამშრომლების მიერ ისლამურ თავსაბურავის „უპატივცემულო მოპყრობასთან“ დაკავშირებით. საქმე ეხება ისფაჰანი-თბილისის რეისის შემოწმების დროს მგზავრებისთვის თავსაბურავის მოხსნის მოთხოვნას.

ქასემის ინფორმაციით, თბილისში მდებარე ირანის საელჩომ საპროტესტო ნოტა გაუგზავნა საქართველოს საგარეო საქმეთა სამინისტროს, ირანში საქართველოს ელჩს კი ამ ფაქტთან დაკავშირებით განმარტების გაკეთება მოსთხოვეს.

„საქათველოში შესაბამის ორგანოებს ასევე შევთავაზეთ შესაბამისი მოკვლევის ჩატარება“,- განაცხადა ქასემიმ.

ქასემიმ იმედი გამოთქვა, რომ მომავალში უსაფრთოების სამსახურები „პატივისცემას გამოიჩენენ მუსლიმი ქალების პირადი ცხოვრების მიმართ და აღარ დაუშვებენ მსგავსი ინციდენტების გამეორებას“.

აღსანიშნავია, რომ მრავალ საერთაშორისო აეროპორტში უსაფრთხოების წესები მგზავრის იდენტიფიცირებისთვის თავსაბურავის მოხსნის აუცილებლობას ითვალისწინებს.