სამართალი

ირაკლი სესიაშვილი საკონსტიტუციო სასამართლოს მოსამართლედ მანანა კობახიძის კანდიდატურას მხარს დაუჭერს

საპარლამენტო უმრავლესობის წევრმა მანანა კობახიძემ, შესაძლოა პარლამენტი დატოვოს. მედიაში გავრცელებული ინფორმაციით, ეს იმ შემთხვევაში მოხდება, თუ კობახიძეს საკონსტიტუციო სასამართლოს მოსამართლედ აირჩევენ.

საკითხზე საუბრისას მმართველი გუნდის წევრები აცხადებენ, რომ კონსულტაციები ჯერჯერობით არ დაწყებულა.

პარლამენტის თავდაცვისა და უშიშროების კომიტეტის თავმჯდომარის ირაკლი სესიაშვილის თქმით, თუ მანანა კობახიძის კანდიდატურა იქნა დაყენებული, იგი მას მხარს დაუჭერს, თუმცა მას არაფერი სმენია იმის შესახებ, რომ კობახიძის კანდიდატურაა დაყენებული.

„ვერ გეტყვით. ამის შესახებ ინფორმაცია ჟურნალისტებისგან გავიგე. ამაზე მსჯელობა უმრავლესობის ფორმატში არ ყოფილა. თავისთავად ცხადია, რომე საკითხი დღის წესრიგში დგას. ვიმსჯელებთ და ამის შემდეგ ოფიციალურად დავასახელებთ. იმ შემთხვევაში, თუ საკონსტიტუციო სასამართლოს მოსამართლის ვაკანტურ თანამდებობაზე მანანა კობახიძის კანდიდატურის საკითხი დადგება, მას ექნება ჩემი მხარდაჭერა“, -აღნიშნა სესიაშვილმა.

რაც შეეხება საპარლამენტო უმრავლესობის წევრ ზაქარია ქუცნაშვილს, როგორც მან პრესკონფერენციაზე აღნიშნა, არჩევანის შემთხვევაში მანანა კობახიძე უნდა წავიდეს პოლიტიკური ხელისუფლებიდან.

“სასამართლო ხელისუფლება არ გახლავთ პოლიტიკური ხელისუფლება, არჩევანის შემთხვევაში, მანანა კობახიძე უნდა წავიდეს პოლიტიკური ხელისუფლებიდან. მე ვერ ვურჩევ ქალბატონ მანანას, სად გააგრძელოს გამოცდილების რეალიზება. ამ ოთხმა წელიწადმა მას ბევრი განსაცდელი გადაატანინა, მე ვფიქრობ, რომ ბევრმა განსაცდელმა მანანა კობახიძე გააძლიერა, როგორც პოლიტიკოსი“, – განაცხადა ზაქარია ქუცნაშვილმა.

მონიკა დავლიანიძე