სამართალი

ირაკლი ოქრუაშვილმა დაადასტურა, რომ სწორედ ზურაბ ადეიშვილისგან მომდინარეობდა ,,იბერიას` კუთვნილი ლიცენზიის იძულებით ჩამორთმევა - პროკურორი

ტელეკომპანია „იბერიას“ საქმეზე გამართულ სასამართლო სხდომაზე ბრალდების მხარის მოწმე, ირაკლი ოქრუაშვილი დაიკითხა.

ოქრუაშვილის განცხადებით, მან პირადად მიიღო ინფორმაცია ,,იბერიას" საქმეზე ბრალდებულ ყოფილ გენერალურ პროკურორ ზურაბ ადეიშვილისგან, რომ ეს უკანასკნელი ტელეკომპანია ,,იბერიას" სამაუწყებლო ლიცენზიის იძულებით ჩამორთმევას გეგმავდა.

როგორც საქმის პროკურორმა, ემზარ გაგნიძემ სხდომის დასრულების შემდეგ ჟურნალისტებს განუცხადა, ირაკლი ოქრუაშვილმა დაადასტურა ბრალდების მხარის ვერსია, რომ სწორედ ზურაბ ადეიშვილისგან მომდინარეობდა ტელეკომპანია ,,იბერიას" კუთვნილი ლიცენზიის იძულებით ჩამორთმევა.

,,მოწმე ირაკლი ოქრუაშვილმა დაადასტურა, რომ სწორედ აღნიშნული ლიცენზიის ჩამორთმევის საკითხის პროცესში ჩართული იყო ზურაბ ადეიშვილი, რომელიც იყო იმ დროს გენერალური პროკურორი. ირაკლი ოქრუაშვილმა უშუალოდ გაიხსენა, თუ რა გარემოებებში ხდებოდა ზურაბ ადეიშვილის მხრიდან აღნიშნული გეგმის განხორციელება, რომელთან მიმართებითაც მან მოახსენა პრეზიდენტ მიხეილ სააკაშვილს და სწორედ აღნიშნულ შეხვედრას თავად ირაკლი ოქრუაშვილიც ესწრებოდა.

შესაბამისად, შეიძლება ითქვას, რომ ირაკლი ოქრუაშვილმა დაადასტურა ბრალდების მხარის ვერსია, რომ სწორედ ზურაბ ადეიშვილისგან მომდინარეობდა ტელეკომპანია ,,იბერიას" კუთვნილი ლიცენზიის იძულებით ჩამორთმევა", - განაცხადა ემზარ გაგნიძემ.