სამართალი

ირაკლი მამალაძე სოსო ოხანაშვილის და დაცვის სხვა ყოფილი წევრების წინააღმდეგ სისხლის სამართლებრივი დევნის დაწყებას ითხოვს

ე.წ. ციანიდის საქმის ერთ-ერთი მთავარი მოწმე, ირაკლი მამალაძე პატრიარქის დაცვის ყოფილი უფროსის სოსო ოხანაშვილის და დაცვის სხვა ყოფილი წევრების წინააღმდეგ სისხლის სამართლებრივი დევნის დაწყებას ითხოვს.

მისი თქმით, დევნის დაწყების საფუძველი საქმეში არსებული მტკიცებულებების მიხედვით, პროკურატურას გააჩნია.

ირაკლი მამალაძე ამბობს, რომ დეკანოზი გიორგი მამალაძე მარტო არ მოქმედებდა, თუმცა მას ეს დანაშაული მხოლოდ საკუთარ თავზე ააღებინეს.

,,მტკიცებულებების მიხედვით, რომლებიც ამ ეტაპზე არსებობს, წინ არაფერი უდგას იმას, რომ სოსო ოხანაშვილის წინააღმდეგ და ასევე, დაცვის სხვა წევრების წინააღმდეგ დაიწყოს მინიმუმ სისხლის სამართლებრივი დევნა. ეს ადამიანები ბოლომდე განეიტრალებულები არ არიან.

მტკიცებულებებში ვგულისხმობ იმას, რაც მეც მივაწოდე გამოძიებას, ასევე ჩემი ჩვენებაც დევს ამ გამოძიებაში, თუმცა გიორგი მამალაძემ აბსოლუტურად არ ითანამშრომლა გამოძიებასთან. მამა გიორგიმ არ დაასახელა ეს პირები და ასე გამოდის, რომ მას საკუთარ თავზე ააღებინეს ეს დანაშაული’’, - განაცხადა ირაკლი მამალაძემ ,,საზოგადეობრივ მაუწყებელთან’’ საუბრისას.

ნინო ექვთიმიშვილი