პოლიტიკა

ირაკლი კობახიძის შეხვედრა გიორგი მიქაუტაძესთან აღიქმება როგორც თავმჯდომარის მიერ კლანის მხარდაჭერა - ანა დოლიძე

იუსტიციის უმაღლესო საბჭოს არამოსამართლე წევრის, ანა დოლიძის შეფასებით, პარლამენტის თავმჯდომარის, ირაკლი კობახიძის შეხვედრა იუსტიციის უმაღლესო საბჭოს მდივან გიორგი მიქაუტაძესთან კლანის მხარდაჭერაზე მეტყველებს და ეს მიუღებელია.

ანა დოლიძემ და საბჭოს კიდევ ერთმა არამოსამართლე წევრმა, ნაზი ჯანეზაშვილმა დღეს აღნიშნულ საკითხზე ბრიფინგი გამართეს.

„ყველა ვაცნობიერებთ, რომ ამ კვირას ჩვენ მოვიგეთ დიდი ბრძოლა, ჩვენ ყველამ ერთად სახელმწიფოს ავარიდეთ ძალიან მნიშვნელოვანი საფრთხე, ვინაიდან სასამართლო კლანს ჰქონდა სასამართლოს მიტაცების კიდევ ერთი მცდელობა. ლევან მურუსიძის უვადოდ დანიშვნა არის კლანის გაფართხალება ჩვენს გამარჯვებასთან მიმართებაში და ამ გამარჯვებისთვის ჩვენ, ყველას გვინდა მადლობა გადაგიხადოთ, ვინც ნებისმიერი ფორმით ამოიღო ხმა. თუმცა ეს ბრძოლა გრძელდება. ამ ბრძოლის ფონზე გუშინ ყველამ შევიტყვეთ, რომ პარლამენტის თავმჯდომარე ირაკლი კობახიძე შეხვდა საბჭოს მდივანს, გიორგი მიქაუტაძეს. იუსტიციის უმაღლეს საბჭოში განვითარებული მოვლენების ფონზე ეს შეხვედრა აღიქმება როგორც თავმჯდომარის მიერ კლანის მხარდაჭერა. ამდენად, ეს შეხვედრა ჩვენთვის მიუღებელია", - განაცხადა დოლიძემ.

კითხვაზე, რატომ არის მიუღებელი ეს შეხვედრა, დოლიძემ უპასუხა, რომ მწვავე ვითარების ფონზე, რომელიც ბოლო დროს იუსტიციის საბჭოში მიმდინარეობს, კობახიძის მხრიდან მხოლოდ მიქაუტაძესთან შეხვედრა აღნიშნული კლანისა და ჯგუფის მხარდაჭერას ნიშნავს.