პოლიტიკა

ირაკლი კობახიძის დღევანდელი შეხვედრა საპატრიარქოში არჩევნებთან არანაირ კავშირში არაა - გიორგი კახიანი

საპარლამენტო უმრავლესობის წევრის გიორგი კახიანის განცხადებით, პარლამენტის თავმჯდომარის, ირაკლი კობახიძის დღევანდელი ვიზიტი საპატრიარქოში არჩევნებს არ უკავშირდება.

„ასეთ შეხვედრებს ხშირი ხასიათი აქვს, ჩვენ მუდმივად ვხვდებით საპატრიარქოს წარმომადგენლებს, რადგან ჩვენთვის ძალიან მნიშვნელოვანია , თუ რას ფიქრობენ საპატრიარქოში ამა თუ იმ საკითხთან დაკავშირებით. მე ვფიქრობ, ასეთი დამოკიდებულება ჩვენს ქმედებებში არაერთხელ გამოჩნდა და საზოგადოებამ ეს ნახა. ესეც ამ ტიპის მიმდინარე შეხვედრა იყო. არჩევნებთან ამას არანაირი კავშირი არ ჰქონია", - განაცხადა კახიანმა.

მისივე თქმით, შეხვედრა საზოგადოებისთვის მნიშვნელოვან საკითხებს უკავშირდებოდა.

დეპუტატის განცხადებით, აღნიშნული შეხვედრები მარიხუანას კულტივაციასთან დაკავშირებულ კანონპროექტსაც არ უკავშირდება, რადგან ეს საკითხი დღის წესრიგიდან მოხსნილია.

„მარიხუანას თემას რაც შეეხება, ამ თემაზე ჩვენ ძალიან ნათლად დავაფიქსირეთ ჩვენი პოზიცია და ეს საკითხი საერთოდ მოხსნილია დღის წესრიგიდან. ეს საკითხი პარლამენტიდან გაწვეულია. ჩვენ ამ საკითხთან დაკავშირებით საზოგადოებისა და საპატრიარქოს პოზიცია გავიგეთ", - განაცხადა კახიანმა.