პოლიტიკა

ირაკლი კობახიძემ არ გამორიცხა, რომ პანკისში ჩატარებულ სპეცოპერაციასთან დაკავშირებით ნდობის ჯგუფი შეიკრიბოს

პარლამენტის თავმჯდომარემ ირაკლი კობახიძემ არ გამორიცხა, რომ პანკისში ჩატარებულ სპეცოპერაციასთან დაკავშირებით ნდობის ჯგუფის შეხვედრა გაიმართოს.

მან აღნიშნა, რომ პარლამენტის საზედამხედველო ფუნქციები არის სუსტი და ფუნქციების ეფექტურ გაზრდაზე მუშაობა უკვე მიმდინარეობს.

„ნდობის ჯგუფის შეხვედრა უკვე შედგა, როცა საქმე ეხებოდა სპეცოპერაციას თბილისში. არც გამოვრიცხავთ, რომ ანალოგიურად შეიკრიბოს ნდობის ჯგუფი სხვა საკითხებთან დაკავშირებით, მათ შორის პანკისში სპეცოპერაციასთან დაკავშირებით, ეს არის ნდობის ჯგუფის ფუნქცია და ბუნებრივია, საქართველოს პარლამენტში ეს მექანიზმი უნდა იყოს აქტიურად გამოყენებული. რაც შეეხება საზედამხედველო ფუნქციებს, არაერთხელ თავად გვითქვამს, რომ ამ მიმართულებით პარლამენტის რესურსები არის ტრადიციულად ძალიან სუსტი, ჩვენ გვჭირდება რესურსების განვითარება, რათა უკეთ განვახორციელოთ ჩვენი საზედამხედველო ფუნქციები. ეს არის ჩვენი ერთ-ერთი ამბიცია და ამ კუთხით მუშაობა მიმდინარეობს. დარწმუნებული ვარ, სამი წლის თავზე, როდესაც ეს პარლამენტი ამოწურავს თავის უფლებამოსილებას, თვისობრივად განსხვავებულ ინსტიტუციას მივიღებთ“, -თქვა კობახიძემ.