პოლიტიკა

ირაკლი კობახიძე-თინა ბოკუჩავას: რამდენჯერმე დაირღვა თქვენს განცხადებებში უდანაშაულობის პრეზუმციის პრინციპი

პარლამენტის თავმდჯომარე ირაკლი კობახიძე პარლამენტის პლენარულ სხდომაზე,“გაზპრომთან“ დაკავშირებით „ნაციონალური მოძრაობის“ წევრის თინა ბოკუჩავას მიერ გაკეთებულ განცხადებას გამოეხმაურა.

თინა ბოკუჩავამ განაცხადა, რომ „გაზპრომთან“ დადებული ხელშეკრულება ბევრ კითხვის ნიშანს ბადებს, მათ შორის იმასაც, რომ კალაძემ ამ ხელშეკრულებით პირადად იხეირა“.

ირაკლი კობახიძის შეფასებით, თინა ბოკუჩავამ ამ განცხადებით უდანაშაულობის პრეზუმცია დაარღვია.

„გაზპრომთან“ დაკავშირებით დებატების გამართვას არავინ არ გაურბის. ჩვენ გვქონდა ამასწინათ დებატები, როდესაც იყო ინიცირებული დადგენილების პროექტი საპარლამენტო ოპოზიციის მიერ. მაშინ ჩვენ მოვისმინეთ გარკვეული ეჭვები, ვარაუდები „გაზპრომის“ ხელშეკრულებასთან დაკავშირებით, თუმცა იმ დებატებში ჩვენ არაფერი კონკრეტული არ მოგვისმენია. რაც შეეხება ამ საკითხს, ის აუცილებლად იქნება განხილული. მეტსაც გეტყვით, თქვენ რამდენჯერმე გქონდათ იმის საშუალება,რომ გამოგეტანათ ეს საკითხი პლენარულ სხდომაზე, თუმცა რამდენჯერმე ფრაქციის თავმჯდომარემ უარი თქვა საკითხის გამოტანაზე. როგორც კი გვექნება შესაძლებლობა, მაშინვე განვიხილავთ დადგენილების შესაბამის პროექტს. პოლიტიკურ შეფასებებს არ გავაკეთებ ქალბატონი თინა თქვენს განცხადებებთან დაკავშირებით. ერთ რამეს ვიტყვი, რომ რამდენჯერმე დაირღვა თქვენს განცხადებებში უდანაშაულობის პრეზუმციის პრინციპი. ჩვენ, დეპუტატებს, რა თქმა უნდა, არ გვეკისრება პასუხისმგებლობა იმ განცხადებებისთვის, რომელსაც საპარლამენტო სხდომებზე ვაკეთბთ, თუმცა ჩვენ პოლიტიკური ეთიკის დაცვა გვმართებს და უდანაშაულობის პრეზუმცია არის ის პრინციპი,რომელიც ჩვენ ჩვენს განცხადებებში აუცილებლად მკაცრად უნდა დავიცვათ“,-აღნიშნა პარლამენტის თავმჯდომარემ.

მონიკა დავლიანიძე