პოლიტიკა

ირაკლი კობახიძე საქართველოში ნიდერლანდების სამეფოს ელჩს შეხვდა

საქართველოს პარლამენტის თავმჯდომარემ, ირაკლი კობახიძემ ნიდერლანდების სამეფოს ელჩთან საქართველოში, იოჰანეს დუმასთან შეხვედრა გამართა. ელჩმა ირაკლი კობახიძეს საქართველოს პარლამენტის თავმჯდომარედ არჩევა მიულოცა და სამომავლო საქმიანობაში წარმატებები უსურვა.

გაცნობითი ხასიათის შეხვედრაზე ორმხრივ ურთიერთობასა და თანამშრომლობის გაძლიერებაზე ისაუბრეს. განიხილეს საქართველოსა და ნიდერლანდების სამეფოს შორის სხვადასხვა მიმართულებით, მათ შორის, საკანონმდებლო ორგანოების დონეზე თანამშრომლობის გააქტიურების საკითხიც.

საქართველოს პარლამენტის თავმჯდომარემ აღნიშნა, რომ ნიდერლანდების სამეფო საქართველოს ერთ-ერთი ყველაზე აქტიური მხარდამჭერი და მსხვილი ინვესტორი ქვეყანაა. ირაკლი კობახიძის თქმით, ნიდერლანდების სამეფოს მხარდაჭერა საქართველოს პარლამენტის აპარატის პროფესიული კვალიფიკაციის ამაღლების საქმეში მნიშვნელოვანია. პარლამენტის თავმჯდომარემ ამ მიმართულებით გაწეული დახმარებისთვის იოჰანეს დუმას მადლობა გადაუხადა და მომავალში მჭიდრო თანამშრომლობის იმედი გამოთქვა.

საქართველოს პარლამენტის თავმჯდომარემ ისაუბრა სახელმწიფო საკონსტიტუციო კომისიის საქმიანობასა და მნიშვნელობაზეც და განაცხადა, რომ გამართული კონსტიტუცია ქვეყნის გრძელვადიანი დემოკრატიული განვითარების საწინდარია. ირაკლი კობახიძემ ელჩს საქართველოს პარლამენტის საქმიანობა გააცნო და ყურადღება საკანონმდებლო ორგანოს ინსტიტუციური გაძლიერების საჭიროებაზე გაამახვილა.

შეხვედრის დასასრულს, მხარეებმა აქტიური და ნაყოფიერი თანამშრომლობისთვის მზადყოფნა კიდევ ერთხელ დაადასტურეს.